Jaguars mitukob sa Game-1

CEBU, Philippines - Naghangad sa ilang beterano ang Ave Maria Sanctuary Park-USJR Jaguars aron lubngon ang San Marino Corned Tuna-USC Warriors, 88-78 ug ingon pagbaton og 1-0 nga bentaha sa 4th CESAFI Partner's Cup "best-of-five" championship series kagabii didto sa Cebu Coliseum.

Sa sayo pa, ang Aerosol-USPF Panthers mipukan sa PTT Fuels-UV Lancers, 72-67 aron sab pagposte og 1-0 ug usa na lang ka daog ang kinahanglan aron maangkon ang ikatulong dapit sa collegiate division. Sa sama gihapon nga paagi, ang Bibbo-CIT Wildkittens mipilde sa Baby Jaguars, 81-75 sa secondary division.

Si Mannie Gabas, kinsa mipabuto og duha ka triples nga maoy nakapaginhawa og lawom sa Jaguars sa ikaduhang kuwarter, maoy nangulo sa kadaugan pinaagi sa iyang 20 puntos, samtang ang sentrong si Kurt Amores mikandos og 16 puntos. Si Armand Ponce mibugwal og 12 puntos, samtang si Jabe Delfino miabuno og 12 alang sa balanseng opensa sa Jaguars.

Ang Jaguars maoy mikontrolar sa duwa, apan kalit nga nausab ang dagan sa ilang duwa nga naghatag og higayon sa Warriors pagsikit sa iskor, 67-68 sa nahabiling 6:20 sa duwa.

Apan sila si Amores ug Ponce nagkumboya og 10 puntos sud lang sa kuwatro minutos aron lawgan ang Jaguars og 80-69 nga bentaha sa katapusang 2:15 sa duwa.

Si Giovanni Padillo milansang og 32 puntos aron pangulohan ang napukan nga Warriors. – BANAT NEWS