Villaceran nag-wild, mi-iskor 69 puntos
CEBU, Philippines - Wala kapugngi si Jaime Villaceran sa iyang pagmangtas diin mihimo kini'g tournament-high 69 puntos aron pangulohan ang Creekside batok sa Lawis, 115-99, sa Game-1 sa ilang “best-of three” finals series sa SK-FDH Hoopfest didto sa Mayors Satellite Gym sa Brgy. Lorega San Miguel.
Sa first quarter pa lang, si Villaceran nakapundo na og 18 puntos alang sa Creekside nga miposte og 12 puntos nga labaw sa maong kuwarter, 33-21. Nahilis sab hinuon ang maong labaw human ang Lawis milusad og mainitong 24-16 nga rally, 45-49 sa first half.
Sa kalisang nga maapsan, si Villaceran mipabuto og tulo ka triples sa tabang sa iyang igsuong si Wilson, kinsa mikadlit og nuybe aron inaton ang labaw ngadto sa 19 puntos sa katapusang dos minutos sa duwa.
Gawas sa managsuong Villaceran, nagtusak-tusak sab ang mga itsa ni Samuel Blas, kinsa miposa og 27.
Sa maong kadaugan, ang Creekside nagkinahanglan na la'g usa ka daog aron hingpit na nilang maangkon ang titulo.
Si Bryan Ruelan mao ang nangulo sa pilderong Lawis sa iyang 32 puntos.
Sa laing bahin, ang San Miguel-A nakabangon human masukarap batok sa Lawis dihang ilang giyatakyatakan ang Itom Yuta, 107-89 aron masakmit ang ikatulong dapit.
Si Francis Rafols maoy topscorer sa San Miguel-A pinaagi sa iyang 35 puntos, samtang si Pastor Amorado, kinsa mi-iskor og 21 puntos mao sab ang nangulo sa Itom Yuta. – BANAT NEWS
- Latest
- Trending
