Mandaue City boxers hari sa Mayor Jonas Cortes Cup
CEBU, Philippines - Giseguro sa mga sakop sa team Mandaue City nga dili sila mapilde sa mga bisitang boksidor pinaagi sa pagdaog sa ilang tagsa-tagsa ka away sa Mayor Jonas Cortes Cup Amateur Boxing at the Park sa Mandaue City.
Si Gerry Baoga, ang mihulip ni Reoxyl Tabogon, kinsa gilabay ngadto sa laing away midominar sa kinatibuk-ang 45-kgs. nga away batok ni Jun-Jun Britaña sa Sta. Cruz alang sa 3-0 nga kadaugan.
Sa iyang bahin, si Tabogon mipukan ni Mark Kevin Soreño sa Flores Boxing Club pinaagi gihapon sa 3-0 nga kadaugan.
Gipilde ni Michael Romarate si Jack Tepora sa Omega Boxing sa bugtong 48 kgs. division match ug ingon man si Basilio Sultan batok ni Joebert Alvarez sa Omega sa 54 kgs. class.
Sa laing bahin, ang Sta. Cruz squad midaog og tulo ka daog ug tulo sab ang pilde.
Si Marvin Pumas mipukan ni Kent Mike Tuñacao sa 24 kgs. division, si Marco Pumar midaog batok ni Ramel Casañares sa 26 kgs. class, samtang si Alvin Alfuro mimakmak ni Romel Tuñacao sa 28 kgs. class.
Si Vicente Seos-e Jr. mihatag og leksiyon ngadto ni Jan-Jan Marzon sa Sta. Cruz sa ilang sangka sa 25 kgs. class. Si Rhazon Tarona sa Philippine-Australia Boxing Club (PABC) mibuntog ni Kit Garces sa Sta. Cruz sa ilang binukbukay sa 28 kgs. division. (BANATNEWS)
- Latest
- Trending
