David susi ng Tigers sa 2 dikit na ratsada, napiling PBA PoW

MANILA, Philippines - Umagaw ng eksena sina Asi Taulava at Chico Lanete sa kanilang unang dalawang laro.

Ngunit si Gary David naman ang nanatiling sandigan ng Coca-Cola upang angkinin ang pansamantalang liderato sa elimination round noong 2009-2010 PBA Fiesta Conference.

Dahilan rito, napili ang pro­dukto ng Lyceum of the Philippines na si David bilang Accel PBA Press Corps’ Player of the Week.

Nagtala ang 6-foot-1 na si David ng mga averages na 18.0 points, 5.0 rebounds, 2.0 assists at 2.0 steals para tulungan ang Tigers sa pagsakmal sa 2-0 rekord katuwang si import James Penny.

“He is really living up to his moniker as ‘Mr. Pure Energy,’ sabi ni Coke head coach Bo Pe­rasol kay David. “He gives us the necessary lift whenever we need it badly.”

Handa naman si David na ibigay ang lahat ng kanyang ma­kakaya, nakuha ng Tigers mula sa Burger King Whoppers na ngayon ay Air21 Express.

“Ang gusto lang naman na­ming lahat na mga players ma­ipakita ang worth namin. Kaya every game, kung ano ma­ibibigay sa team,” wika ng off-guard na si David.

Hindi na rin bago si David kay Perasol matapos silang mag­­kasama sa Air21.

“Matagal na rin naman kami ni Coach Bo kaya alam niya na ang kailangan ng team energi­zer at iyon ang ibinibigay ko, at kung ano pa ang mai-de-deliver para sa team,” paliwanag ni David.

Sa 108-98 panalo ng Coke sa nagdedepensang San Mi­guel noong Sabado sa Gingoog, Misamis Oriental, tumipa si Da­­vid ng 19 puntos galing sa 5-of-13 fieldgoal shooting at may perpektong 7-of-7 sa freethrow line.

Bukod pa rito ang 6 rebounds, 4 assists at 2 steals sa loob ng 33 minut.

Nagtala naman ang miyembro ng 2006-07 Mythical Five ng 17 marka, 4 rebounds at 2 steals sa 97-74 paglampaso ng Tigers sa Barako Coffee Masters sa ka­nilang unang laro.