CEBU, Philippines - Bag-ohay lang natong hisayran gikan gyud mismo sa mga kasaligang tinubdan nga ang PBA aduna nay bag-ong team nga ihulip sa Purefoods Hotdogs alang sa KFC Fiesta Conference ug kini mao ang Derby Ace, usa ka matang sa pagkaon sa mga manok hinigtan ug sunoy produkto sa B-Meg Feeds Animal Health Care division nga gipanag-iya gihapon sa San Miguel Corporation.
Ilhon silang Derby Ace Llamados sa korte ug subhan sila batok sa mga Aces sa Alaska karong Abril 4 diin tinguha nilang lugwayan ang ilang daog ngadto sa 5-0 dihang giharus sa Hotdogs ang PBA Philippine Cup finals sa 4-0. Wala pa hinoon ibutyag kung kinsa maoy ilang import apan ang Aces adunay diamante nga si Diamon Simpson.
Una akong nakakita niining Derby Ace sa pahinumdom sa telebisyon nga adunay salto kaayong mga manok nga maglupad-lupad tungod kay kini diay’ng Derby Aces maoy labing kusog nga feeds alang sa mga hinigtan. Ang mga sabungero mismo maoy makapamatuod niini dili ako kay dili man ako sugarol og manok. Usahay mosugal ako og mahjong agi’g palabay sa oras.
Daan nang sikat kining B-Meg kay dugay na sab kining maoy gigamit nga feeds sa mga baboy ilabi na kadtong adunay piggery.
Dili lang kay usa o duha ka sako ang paliton sa mga piggery owners apan tagsa gyud ka truck nga feeds.Bisan didto sa Poro, Camotes, miabot ang produkto sa B-Meg dihang bata pa ako.
Misamot kailado ang Derby Ace tungod sab sa senemanang programa sa TV ni Boyet Cortes, ang PR man sa B-Meg nga nag-ulohan “Let’s Do Business” matag Domingo sa alas 7 ngadto sa 7:30 sa buntag sa ABS-CBN Channel 3.
Niadtong Martes sa udto, nahimamat nako ang tulo ka opisyal sa B-Meg nga sila si Jojo Lindo, ang Area Sales Manager sa SMFI-Feeds Business VisMin, Anju Barrieses, ang Territory Sales Manager sa Central and Eastern Visayas, SMFI Feeds Business ug si Dr. Joe Arias, ang team manager sa bag-o lang nahimong kampiyon nga B-Meg Expert Hog Pellet-UV Baby Lancers kinsa maoy hari sa bag-o lang natapos nga Nokia- National Basketball Training center (NBTC) basketball tournament didto sa City sports Club gym sa Ayala.
Kulba-hinam kaayo ang nahimong resulta dihang nag-agi una og duha ka overtime ang Baby Lancers aron pagpukan sa Ave Maria Sanctuary Park-USJR Baby Jaguars sa iskor, 96-94. Human sa duwa, gibangkahan dayon ni Lindo ug kaubanan lakip na ni Boyet ang Baby Lancers og usa ka paniudto.
Didto nako hisayri unsang matanga kining B-Meg feeds bisan pa sa kamubo sa mga gutlo sa among kukabildo. Dili mosalmot sa PBA ang B-Meg kung dili pa minilyon ang kita o income.
Busa, karon pa lang ganing higayona, dili na maglisod ang Partner’s Cup sunod tuig pagpangita og sponsor alang sa UV. Keep the UV spirit burning, matod pa sa mga patay-lunod nilang supporters.
* * *
Summer na usab. Dili na gyud kalikayan ang summer tungod sa kainit sa panahon. Bag-o lang natapos ang klase sa mga dagkong unibersidad dinhi sa Sugbo.
Matag tuig, nabatasan na sa mga coaches ang pagpahigyon og mga basketball clinics. Dili lang basketball apan lain-laing sports clinics sama sa tennis, swimming, taekwondo, karate ug bisan gani mga voice lessons, piano lessons, guitar lessons ug acting workshops aron lang gyud dunay kalingawan ang mga kabataan sulod sa duha ka buwan kapin nga bakasyon.
Ang atong mga higala nga coaches nagpa-unhanay na og pa-reserba sa mga gyms diin adto ipahigayon ang ilang mga clinics. Tungod sa kadaghan ug dili na na nato matigamnan ang mga petsa sa ilang clinics.
Sa kasamtangan, ang segurado lang nga akong nahibaw-an mao ang umaabot nga Alaska Power Camp ni UC Webmasters coach Roel Gomez, Hapee On-Line ni Mark Tallo, Time Out ni Rex Salvana, One On-One- ni Edsel Vallena, UC nilang Reggie Licanda, Caleb Gawangon ug Joever Samonte, UV clinic nilang Boy Cabahug ug Al Solis, Consolacion clinic ni Pafom Pepito, USC summer clinic sa South ug North Campuses nilang Ope Abellana ug Sir Saturnino Mayormita ug ingon man kanilang coach Roland Remedio ug Galimar Largo, PCGS ni coach Tata Merced, Paref-Springdale ni Ryan Betia, CIT basketball clinic, Don Bosco, Sacred Heart, YMCA ug daghan pa kaayo nga wala pa nato hisayri. Pasensiya na lang sa atong nalimtan paglista tungod sa kadaghan ninyo nga atong higala dinhi sa SPORTSgab.
Miscellaneous. Thanks to coach Roel Gomez and his wife for the belated birthday gift. Congrats to CCTN-Channel 47 news anchor and Hello Cebu Maayong Buntag Pinoy host Divine Marcial-Flores for passing the 2009 bar exams. Also to Rachelle Ann “Dimple” Agas, granddaughter of former UC coach Dodong Agas who graduated first placer at the STI College of Nursing. Congrats too to Rita Angela Leoniz Tongco for having finished fifth honor at the St. John of Kenty School in Consolacion,Cebu. She was also awarded Best in Science, Most Responsible and Most Industrious pupil aside from her academic excellence. Advance birthday greetings to Leoniz’ mother Arlene Tongco on April 1. Belated birthday greetings to my brother-in-law Jene Po last March 24 and sister-in-law Rita Ortega last March 27. - BANAT NEWS