10th CAFC National Inter-Club Footbal Cup gitakda

CEBU, Philippines - Hapit na mahitsas ang mga koponan mga moapil sa 10th Cebu Amateur Football Club (CAFC) National Inter-Club Football Cup nga gikatakda karong Abril 24 hangtod sa Mayo 2 sa managlahing mga binyu dinhi sa Sugbu.

Gawas lang sa girls division diin bugtong ang Sacred Heart School ang mipadayag sa ilang partisipasyon sa usa ka semana nga kompetisyon.

Ang Sacred Heart School mowadwad sa girls 17 category ning mas labing daku nga football event sa Sugbu karong summer.

Ang mga opisyales sa CAFC nga gipangulohan ni Glenn Quisido miawhag sa mga batan-ong babaye nga mahigugmao'g football sa pag-apil.

Sa miaging tuig, adunay tulo ka female team nga nangahas sa pagsalmot.

Sa laing bahin, ang tanang kampiyon sa tagsa-tagsa ka male category ang andam modepensa sa ilang korona gawas sa Don Bosco's player 10 squad.

Ang DBTC coaching staff nagkabudlay karon sa ilang preparasyon alang sa Palarong Pambansa mao nga wala pa sila makadesisyon kun mopadala ba sila og team sa players 10 bracket.

Sa unom ka kategoriya sa boys division, ang boys 14 adunay labing daghang mga entrante nga adunay 10.

Ang men's open adunay pito ka teams nga pangulohan sa defending champion Army's 53rd Engineering Brigade, ang men's 38-above adunay lima, boys 12 nga dunay unom ug ang players 10 adunay upat sa pagka karon.

Alang sa dugang mga kasayoran, mahimong motawag ni Greg sa 0923-4540442 or 0915-4210361, Francis at 0923-4541353 or Peter at 0922-5520110.   (BANATNEWS)