Daghan dismayado kang Clottey

CEBU, Philippines - Bagang duot sa mga boxing fanatics ang personal nga misaksi sa sangka ni Manny Pacquiao batok ni Joshua Clottey didto sa Cowboys Stadium sa Dallas, Texas, diin midaog ang Pinoy boxing icon pinaagi sa unanimous decision aron panalipdan ang iyang WBO title.

Apan bisan paman sa nagmalampusong boxing event nga unang gipahigayun didto sa halapad nga Cowboys Stadium, ubay-ubay usab nga mga fans ang mipadayag nga wala sila makontento sa away.

Dinhi sa Sugbu, mismo si Cebu City Vice Mayor Michael Rama mipahungaw sa iyang kadismaya sa nahitabong sangka.

 “He fought like a sparring partner (of Pacquiao). Asa ka mangita og boxer nga magsige og cover. Hinuon dili pud ta ka blame niya (Clottey) kay basin sa iyang huna-huna naa na gud siya'y one milllion dollars unya nganong magpa-igo pa man siya?"

Gilaay usab nagtan-aw ang giilang amahan sa ALA Boxing nga si Antonio "Bidoy" Aldeguer sa maong away nga giisip niya nga usa ka one-sided fight, samtang si City Councilor Sylvan "Jack" Jakosalem mihulagway ni Clottey nga nahisama sa usa ka punching bag.

Hinuon nakasabot si Jakosalem nga ang pagpunay og panagang ni Clottey paagi sa Aprikano aron malikayan ang usa ka knock-out nga kapildehan.

Si ALA Promotions Michael Aldeguer nagkanayon nga gipagawas ni Pacquiao ang tanan niyang abilidad ug si Clottey ang angay basulon sa kalaay sa away.

Si Sr. Supt. Patrocinio Comendador, director sa Cebu City Police Office sa iyang bahin nagkanayon nga mas maayo unta kun na-knockout si Clottey sama sa mga nakasangka ni Pacquiao kaniadto.

“Nalingaw as in previous fight, but it would have been best if na-knockout si Clottey,” matud pang Comendador.

“Lupig gyud. Wa padaog si Clottey pero way ayo ang away kay sige ra'g depensa si Clottey," sumala pa ni Ernesto Patinite, usa ka taxi driver. - Lemuel P. Maglinte (BANAT NEWS)