Niños naka-ipsot sa Aces

CEBU, Philippines - Mipaluhod og laing dekalibreng PBA team ang M. Lhuillier Kwarta Padala-Cebu Niños dihang naka-ipsot kini batok sa Alaska Aces, 88-87 sa ilang exhibition game kagabii didto sa University of San Carlos (USC) Main gym.

Ang free-throw ni Abby Santos sa katapusang singko segundos maoy mihatag sa daog sa Niños, apan ang import niining si 6-foot-6 Jason Forte maoy topscorer sa maong kadaugan.

Si Forte miposa og 24 puntos, samtang si Santos mi-iskor og sayes puntos alang Niños, kinsa maoy pirmeng naggukod sa nag-unang tulo ka kuwarter.

 Ang kanhi Alaska cager nga si Stephen Padilla mipabuto og 22 puntos alang sa Niños.

Nagsinukliay og mga puntos sa duha ka kampo nga miresulta sa panagtabla sa halftime, 42-all , apan ang All-Filipino Cup finalist Aces mihirit og mga puntos sa third period aron pagposte og 11 puntos nga bentaha, 69-58 pinaagi sa pagpangulo sa import niining si Diamon Simpson ug 6-foot-9 center Samigue Eman nga nagkumboya og 16 puntos.

Gawas sa mikagar ang ilang mga outside shots, nakasugat usab og suliran ang Niños dihang na-injured ang sinaligang point guard nga si Woodrow Enriquez, kinsa gipasakay og stretcher paingon sa gawas sa gym aron isakay sa ambulansya. 

Bisan pa niini, wala makupsi sa paglaom ang Niños ug mibawos pinaagi sa paglusad og 10-4 rally sa giya nilang Forte, Padilla ug Bruce Dacia aron pahakan ang labaw sa Aces ngadto na lang sa dos puntos, 85-87 sa katapusang 1:15 sa duwa.

Ang free-throw ni Santos maoy miselyado sa kadaugan sa Niños.

Ang Aces gipangulohan ni Simpson sa iyang 26 puntos, samtang si Eman miamot og 11 puntos.

Ang Niños ug Aces subling mag-abot karon didto sa Bogo City Complex alang sa katapusang adlaw sa ilang

exhibition games. – BANAT NEWS