Gilas Women naisahan ng Mexico

MANILA, Philippines — Kabiguan ang sumalubong kay Canadian coach Burke “BT” Toews at sa Gilas Pilipinas Women sa pagbubukas ng FIBA Women’s Olympic Pre-Qualifying Tournament 2026.

Minalas ang World No. 30 Gilas Women kontra sa No. 31 Mexico, 58-61, sa kanilang unang laro kahapon sa Arena Astros sa Guadalajara, Mexico.

Umiskor si point guard Vanessa De Jesus ng 15 points para sa mga Pinay cagers, habang may 14 markers si center Jack Animam at nagdagdag ng tig-walong puntos sina Gabby Dela Rosa at Sophia Dignadice.

Kumamada si De Jesus ng 13 points sa first half kung saan ipinoste ng Gilas Women ang isang 15-point lead, 35-20, sa second quarter bago nakalapit ang Mexico sa 39-43 sa third period.

Muling nakalayo ang mga Pinay dribblers sa likod nina Jhazmin Joson at Dignadice, ngunit umarangkada ang mga Mexicans at inagaw ang 59-57 bentahe sa dulo ng fourth canto .

Ang free throw ni Animam ang nagdikit sa Gilas Women sa 58-59.

Matapos ang split ni Destiny Pitts para sa Mexico ay naagawan naman ni Anisa Jeffries si De Jesus.

Pipilitin ng Nationals na makabawi sa pagharap sa No. 7 Canada bukas ng alas-7:30 ng umaga.