MODS-GAA champs sa BAR caging
CEBU, Philippines - Gibuntog sa MODS-GAA Selection/Lai Garden ni team owner Dr. Boy Te ang JMA, 84-81 aron sakmiton ang kampiyonato sa Basketball Association of Ramos (BAR) 3rd Conference nga giulohan og "Joy Young Cup" niadtong Huwebes sa gabii diha sa Cogon-Ramos Sports Complex.
Ang GAA nabiyaan og 14 puntos sa second period, 15-29, apan mihimo kini'g dakung lakang pagsugod sa third period aron pakuratan ang JMA pinaagi sa ilang mainitong rally.
Nahimo pang physical ang duwa tali nilang Joselito Ocampo sa GAA ug ni Dodong Abarintos sa JMA nga gustong makapuwesto sa ilawom aron makakuha sa rebound nga diriyot gyud moresulta og sinukmagay.
Sila si Ocampo, Inting Reyes ug ex-SWU Cobra star Rey Potot maoy bida sa rally sa GAA.
Si Potot mi-iskor og 34 puntos uban ang duha ka triples aron pangulohan ang GAA. Gitabla niya ang iskor, 78-all sa nahabiling 1:45 sa duwa ug dayon mitusak og upat ka free throws aron hatagan ang GAA og 82-78 nga bentaha nga maoy yawi sa ilang kadaugan.
Si Bagtong Minoza mibugha og 16 puntos ug tulo ka blocks alang sa GAA, samtang si Reyes nga nahimong point guard gikan sa shooting guard hulip ni Allan Ricana, mitampo og 11 puntos uban ni Ocampo.
Ang kanhi UC standout nga si Julius Gastador maoy nangulo sa JMA sa iyang 26 puntos, samtang si Ronnie Ruiz midugang og 15 puntos sa maong kapildihan.
Sa sayo pa, ang second-seed AMBL nga gipangulohan ni Dindo Sauza mi-iskor og 106-102 nga kadaugan batok sa JRJV nga gipangulohan ni Jimbo Noel aron sa pagpahiluna sa ikatulo nga dapit. (BANATNEWS)
- Latest
- Trending
