Mawin's, Emilmich nagsawo sa liderato

CEBU, Philippines - Mikulit sa ilang ikaduhang daog ang Mawin’s Kitchen ni team owners Sherwin Lequit ug Maia Adriatico ug ingon man usab ang Emilmich ni Emily Badon human ilang gipilde ang tagsa-tagsa nila ka kaatbang aron saw-an ang liderato sa managsamang 2-0 win-loss records sa JS Contractor’s Cup 2010 summer basketball tournament sa Vicente Sotto Memorial Gym sa barangay Punta Princesa, ning dakbayan.

Ang Mawin’s Kitchen wala kaayo kahuygo sa first half, apan hinay-hinay silang nakakuha’g kompiyansa sa third quarter diin mibuhos sila og 24-8 nga rally aron pagposte og 10 puntos nga bentaha, 52-42 sa wala pa nila maangkon ang 70-61 nga kadaugan batok sa Panthers.

Si Mat Vallejo maoy nangulo sa Mawin's Kitchen pinaagi sa iyang 22 puntos, gisundan ni Egin Taborada nga adunay 16 puntos, samtang ang pilderong Panthers gipangulohan sab ni Weweng Ibrada, kinsa milawog og 15 puntos ug si Aden Yray miamot og 13 puntos.

Sa laing bahin, ang Emilmich mi-iskor og 58-52 nga upset batok sa mas paboritong Victor Village Residence Association (VVRA).

Si Jun Llenes maoy nangu sa Emilmich sa iyang 17 puntos, samtang sila si Gerry Empenado, Neptune Carungay parehong miposte og 15 puntos aron pangulohan ang VVRA.

Sa laing duwa, ang Jacpat Shee mipukan sab sa Cab's Net sa iskor nga 62-55 alang sa ilang unang daog sud sa duha ka duwa.

Puntos Matag Usa

Unang duwa:

Mawin’s (70) - Vallejo 22, Taborada 16, S. Lequit 10, Lequit 6, Cabahug 4, Madreliño 4, Tecson 3, Pineda 2, Villalon 2, Bouffard 1

Panthers (61) - Ibrada 15, Yray 13, Padigos 6, G. Baclaan 6, a. Vallejo 6, Amat 4, R. Baclaan 4, P. Yray 3, Dungog 2, S. Vallejo 2

Ikaduhang duwa:

Emilmich (58) - J. Llenes 17, M. Badon 10, Viñalon 10, V. Llenes 6, Piliotas 6, Ilagan 3, Olpoc 2, J. Badon 2, Jañola 1, Iconas 1

VVRA (52) - G. Empenado 15, N. Carungay 15, Quiroz 7, J. Carungay 5, Canlom 2, Velez 2, Liboon 2, Juntilla 2, Bayona 2. – BANAT NEWS