CEBU, Philippines - Tulo ka nag-unang expert riders dinhi sa Sugbu ang manimpad na sab sa internasyonal nga kompetisyon dihang mosalmot kini sa FIM Puerto Princesa Asian Motocross Championships 2010 nga gikatakda karong Pebrero 21 didto sa Puerto Princesa, Palawan.
Ang tulo ka dekalibreng riders mao sila si Jon-Jon Adlawan ug ang managsuong Jubenile ug Juvanni Abellar sa PowerSports Racing (PSR).
Ang bangga sa Palawan langkuban sa national ug international races diin si Adlawan maoy usa sa mga pambato sa nasud.
Ang international event naglakip sa Asian 125 ug junior international race.
Mga kategoriya nga tigian sa national motocross mao ang peewee, executive, 65 cc., pro open, beginners open production, pro open, intermediate, novice open production, veteran ug open enduro.
Gawas sa motocross, may kompetisyon sab sa underbone diin ang managsuong Abellar mopakita'g aksiyon. – BANAT NEWS