Niños hari sa pre season sa Liga Pilipinas

CEBU, Philippines - Mihipos sa labing una nilang kampiyonato karong tuiga ang M. Lhuillier Kwarta Padala Cebu-Niños human nila gilubong ang Trace-Laguna Stallions, 83-63 sa finals sa pre-season sa Smart Liga Pilipinas Conference 4 kagabii diha sa Cebu Coliseum.

Pagsugod pa lang, ang Niños ni team owner Michel J. Lhuillier ug multi-titled coach Raul 'Yayoy' Alcoseba mipatuman dayon sa ilang fast break plays nga maoy midagkot sa ilang 15-5 rally sa unang singko minutos sa duwa.

Gawas sa ilang nagpungasi nga mga opensa, nahimong alas sa Niños ang makatuok nila nga depensa nga igo lang mipa-iskor sa Laguna og 16 puntos batok sa ilang 27 puntos sa second period.

Nakab-ot sa Niños ang 22 puntos nga labaw, 67-45 nga maoy labing daku nilang biya human sa lay-up ni Richard Ian Saladaga gikan sa pasa ni Woodrow Enriquez sa katapusang dos segundos paingon sa final period.

Si Abby Santos maoy leading scorer sa Niños pinaagi sa iyang 14 puntos, samtang si Saladaga ug si Bruce Dacia miposa og 12 ug 11 puntos matag usa.

Ang giihaw nga Stallions gipangulohan nilang Jay-R Estrada ug John Villaver nga mikadlit og nuybe puntos matag usa.

Sa laing bahin, ang GenSan Pacman MP Warriors mipukan sa Ave Maria Sanctuary Park, 86-72 aron paglangkat sa ikatulong dapit.

Puntos Matag Usa

CEBU (83) – Santos 14, Saladaga 12, Dacia 11, Basco 8, Magsumbol 7, Enriquez 7, Cruz 5, Nailon 4, Mepaña 4, Poligrates 3, Padilla 3, Mondragon 3, Ababon 2

LAGUNA (63) – Estrada 9, Villaver 9, Musni 8, Grijaldo 7, Capati 6, Losentes 6, Angeles 5, Ricafuente 5, Sanz 4, Bolocon 2, Mangahas 2. – BANAT NEWS