Super Idols milubong sa YLAC sa IBP cagefest

CEBU, Philippines - Gisubhan og daog ang defending champion Super Idols sa pagpangulo ni Ramsey Quijano pinaagi sa paglubong sa YLAC, 74-54, samtang laing duha ka teams ang mikulit sab og impresibong kadaugan sa pagsugod sa 2010 Integrated Bar of the Philippines (IBP) basketball tournament diha sa Capitol Parish gym sa dalan Escario, ning dakbayan.

Sa laing mga duwa, ang Mt. Zion miposte og nipis nga kadaugan batok sa mas paboritong Pecandela Law Office, 54-53 ug ang Pañeros mipukan sa Iron Eagles, 68-59. Ang Pecandela Law Firm ug ang Pañeros, parehong mi-abante sa semifinals sa maong torneyo sa miaging tuig.

Ang Super Idols miratsada sa sayong bahin ug miposte kini og 36-27 nga bentaha sa halftime.

Ang 6-foot-2 center nga si Fermin Pepito maoy nangu sa   Super Idols sa game-high 33 puntos, samtang si Noel Adlawan mipupo og 18 puntos alang sa YLAC.

Sa laing bahin, ang Mt. Zion milusad og 22-13 sa fourth period aron tumbahon ang Pecandela.

Si Benjie Macion maoy nangu sa Mt. Zion sa iyang 14 puntos. Sila si Mark Russ Gamallo, Francis Pepito ug Jessie Capoy parehong mihipos og 10 puntos aron pangulohan ang Pecandela.

Sa main game, sila si Barry Busi ug Dennis Aliño maoy nangulo sa Pañeros uban ang 12 ug 10 puntos matag usa. Si Ian Santos maoy topscorer sa Iron Eagles sa iyang 20 puntos.

PUNTOS MATAG USA

Super Idols (74) - F. Pepito 33, Abayon 12, Ibones 8, R. Quijano 7, Malig-on 4, J. Quijano 2, Salubre 2, Daluz 2, Pepito 2, Heyrosa 2

YLAC (54) - Adlawan 18, Ligutan 8, Sapayan 7, Arnaiz 6, Guieb 4, Bernido 4, Asis 4, Ang 2, Villarin 1    (BANATNEWS)