Power 40 kaging sa laba

CEBU, Philippines - Gipakuratan sa Los Amigos Basketball Association (LABA) ang mas lig-on ug title-favorite Power Forty pinaagi sa pag-iskor og impresibong 92-80 nga kadaogan kaniadtong Sabado sa gabii sa nagpadayong Cebu Golden Basketball League (CGBL) didto sa Inayawan Sports Complex.

Sa sayo pa, ang Danao Ruby Star Basketball Association (DARUSBA) mipukan sa Minglanilla Basketball Association (MIBA), 97-88 aron moabante sa unahan ug nakigtabla na sa Better Run Basketball Association (BRBA) sa ilang 2-3 nga baraha.

Sila si Dodoy Rizane ug Ansing Companion nagkumboya og 49 puntos aron pangulohan ang LABA sa ilang 26 ug 23 puntos matag usa. Mao kadto’y naghatag og gibug-aton alang sa mga abaga sa Power Forty kinsa nagsalig sa 23 puntos nga nahimo sa beteranong point guard nga si Michael Arias.

Laing duha ka players sa LABA mibahug sab og double figures diin si Marlon Pangan miabuno'g og 16 puntos ug ang ex-Lancer nga si Butong Unabia miamot og 13 puntos.

Pulos sab mi-iskor og double figures sila si Gilbert Gajudo, Cesar Ortega ug Stevenson Dajalos alang sa Power Forty.

Sa laing bahin, mibugha og 23 puntos si Rowen Capoy aron pangulohan ang DARUSBA samtang si Ricky Manulat mi-iskor og 17 puntos. Ang ilang team leader nga si Joel Castañeda uban kang Rudy Capoy ug Dennis Batac parehong mitunol og 15 puntos alang sa mga players gikan sa Danao.

Si Monching Cadiz mihakot og 25 puntos alang sa MIBA ug gisundan siya ni Titing dela Torre kinsa miposa og 22 puntos.

Karon sa tunga-tunga na sa torneyo sa CGBL, ang Naga Above Forty Basketball Association (NAFBA) maoy nahimutang sa kinaubsan sa ilang 1-4 nga baraha.

Puntos matag usa:

First Game:

DARUSBA (97)– R. Capoy 23, Manulat 17, Castañeda 15, Capoy 15, Batac 15, Murillo 10, Almacin 2

MIBA (88)– Cadiz 25, Dela Torre 22, Vasquez 11, Campos 8, Medalle 6, Mejias 2

Second Game:

LABA (92)– Rizane 26, Companion 23, Pangan 16, Unabia 13, Evangelista 7, Lopez 7

Power Forty (80)–Arias 23, Gajudo 11, Ortega 10, Dajalos 10, Ceballos 8, Gacayan 6, Yosores 5, Bughao 4, Dela Rama 2, Eleguin 1. - Gabby G. Malagar (BANAT NEWS)