ML Kwarta Padala mopaluyo sa CYBL 2010

CEBU, Philippines - Nakadawat og dakung suporta gikan sa M. Lhuillier Kwarta Padala (MLKP) ang Cebu Youth Basketball League (CYBL) nga gikatakdang buksan ugma diha sa Sacred Heart School-Jesuit (SHS-J) Mango Campus gym, ning siyudad.

Sugod karon, ang CYBL 2010 tournament tawgon na og ML Kwarta Padala Cup.

Ang ML Kwarta Padala Cup sa CYBL salmotan sa mga dekalibreng koponan gikan sa nagkadaiyang tunghaan dinhi sa

Sugbu.

Bahinon kini ngadto sa tulo ka dibisyon -- 16-Under, 13-Under ug 10-Under.

Adunay 21 ka koponan ang kompirmadong mosalmot nga pangulohan sa CYBL 2008 16-Under champion University of San Carlos (USC) South Campus. Atubangon nila ang ilang sister school USC North ug Sacred Heart School-Jesuit (SHSJ).

Moduwa sa 16-under mao ang Cebu Institute of Technology (CIT), University of San Jose-Recoletos (USJR)/ Ave Maria Sanctuary Park, Springdale ug USC South-B.

Ang 13-under gibuak sa duha ka brackets nga mao ang Division A ug Developmental division. Ang USC North modepensa sa ilang titulo sa Division A diin ilang sangkaon ang 2009 Milo BEST SBP Cebu champion USC South-A, SHSJ-A ug SHSJ-B. 

Samtang sa developmental division, magtigi alang sa titulo ang USJ-R/Ave Maria Sanctuary Park, Springdale, Southwestern University (SWU) ug ang USC South-B.

Andam na usab manalipod sa ilang korona ang SHS-J sa 10-under group batok sa USC North, USJ-R/ Ave Maria Sanctuary Park, USC South ug Springdale.    (BANATNEWS)