Reyes Master of the Table sa Derby Classic

MANILA, Philippines - May asim pa kung paglalaro ng bilyar ang pag-uusapan si Efren “Bata” Reyes.

Ipinamalas ni Reyes na kaya pa niyang sundan ang mabungang kampan­ya noong 2009 sa taong ito nang makapagdomina sa idinaos na 12th Annual Der­by City Classic sa Horse Shoe Hotel and Casino sa In­diana, US.

Matapos mapagha­rian ang Fatboy 10-ball event ay isinunod ni Re­yes ang titulo sa 9-ball na nagtulak din upang hi­rangin siya bilang Mas­ter of the Table sa 10-araw na torneo.          

Bumangon si Reyes buhat sa pagkatalo sa se­cond round nang ka­lu­sin sa semifinals si Shan­non Murphy upang maitakda ang tagisan nila ni Rodney Morris pa­ra sa titulo.

 Sa labanang ito lu­mabas ang husay sa pag­lalaro ni Reyes nang ta­nging ang tatlong dry breaks ang masasabing dungis na nasilayan tungo sa 7-4 panalo.

 Ang panalo sa kompetisyong nilahukan ng 257 manlalaro ay nagkahalaga ng $16,000 pero higit dito ay nagresulta para hirangin din ang tu­bong Angeles, Pampanga bilang Master of the Table.

Ang Master of the Table ay ibinibigay sa manlalarong may pinakamagandang naitala sa lahat ng events na kasama sa Derby City Classic.

Ito ang ikalimang pagkakataon na nakuha ni Reyes ang nasabing parangal.