CEBU, Philippines - Labing menos 10 ka kanhi riders ang subling mopakita sa ilang tinipigang abilidad sa Wanggits division sa 1st Hon. Zigfred Povadora Duterte Motocross Series Habal-Habal and Wanggits Showdown nga mosikad karong adlawa didto sa Caduawan, Tabogon sa amihanang Sugbu.
Sila si Junior Pestaño, ang DepEd District Supervisor sa San Remigio 2 ug Edmund Pingkian, managing head sa Mandaue Sunriser Manufacturing Corp. maoy mangulo sa maong dibisyon.
Sila si Pestaño ug Pingkian, kinsa maoy mga ngilngig nga riders sa ilang panahon, gipanglantawan nga maoy mag-ilog sa korona.
Nagpanikad sab nga moladlad sa ilang abilidad sila si Celfred Espina, Efren Sanico, Bong Toong, Fredo Besavilla ug Joe Ho.
Gipahibalo ni Siegfred Ornopia, ang 2008 MS Motosuit Motocross "Rider of the Year," nga gawas sa Habal-Habal ug Wanggits divisions, may lumba sab alang sa executive A , executive B, beginners selection, beginners first timer, mini ug pewee aron mahatagan og katagbawan ang mga motan-aw sa lumba.
Gitug-an sab ni Ornopia, ang tag-iya sa Keiz BJ Motors nga dili momenos 30 ka entrante gikan sa nagkalain-laing bahin sa Sugbu ang mosalmot sa Habal-Habal category.
Sa laing bahin, mikompirmar nga mosalmot sa executive A mao sila si Andy Krickl, Philip Montejo, Russel Gungob, Noli Rom, Jonathan Tapayan, Titing Sicad ug Marte Batulan.
Sila Rom, Montejo, Tapayan, Batulan, Sicad moapil sab og lumba sa executive B uban nilang Efren Sanico ug Bobong ug uban pa.
Mobalik na sab sa aksiyon ang kinamaguwangang anak sa magtiayong Siegfred ug Ellen Ornopia nga si Earl Jean Brylle, human maalim ang piang sa iyang tuong tiil atol sa 16th leg sa MS Motocross Series didto sa Liburon sa dakbayan sa Carcar sa miaging tuig. Si Brylle mopakita'g aksiyon sa mini class, samtang ang iyang manghod nga sila si Ken ug Keizer modagan ubos sa pewee division.
Ang usa ka adlaw nga kompetisyon nga gipasiugdahan sa Keiz BJ Motors gisuportahan sab sa Sunriser Motorcycles. (BANATNEWS)