Niños nagkalig-on

CEBU, Philippines - Misamot karon kalig-on ang line-up sa M. Lhuillier Kwarta Padala-Cebu Niños tungod sa ilang pagkuha sa duha ka higante nga sila si Nat Cruz ug Hafer Mondragon alang sa umaabot nga 2010 Liga Pilipinas nga buksan karong Pebrero 3.

Sila si Cruz ug Mondragon nga parehong adunay gitas-on nga 6-foot-5, mohatag og dugang kusog uban sa karaang mga magduduwa sa two-time Liga Pilipinas champion Cebu Niños.

Ang kanhi magduduwa   sa Ilocos Sur Bravehearts nga si Cruz ug kanhi cager sa Quezon Red Oilers nga si Mondragon, maoy mohulip sa posisyon nga gibakantihan nilang John Malinao ug JR Escobal, kinsa gibuhian sa kadagkuan sa Cebu Niños.

Si Raul 'Yayoy' Alcoseba, ang head coach sa Cebu Niños, nagkanayon nga ang pagkuha nilang Cruz ug Mondragon magsilbeng dakung tabang alang sa iyang koponan nga manalipod sa ilang titulo.

Ang Cebu Niños napatik na sa kasaysayan human sila mirehistro og 21-game sweep sa miaging Liga Conference 3.

Gawas sa kampiyonato, nakuha usab ni point-guard Woodrow Enriquez ang season MVP award, samtang ang beteranong tirador nga si Stephen Padilla mao usab ang gikoronahang Finals MVP. – BANAT NEWS