Mayol andam na modepensa

CEBU, Philippines - Andam na ang Sugbuanong world boxing champion nga si Rodel 'Batang Mandaue' Mayol nga modepensa sa labing unang higayon sa iyang WBC light flyweight title batok ni mandatory challenger Omar Nino 'Giant Killer' Romero karong Pebrero 27 didto sa Tepic sa Nayarit, Mexico.

Ang garbo sa San Fernando nga si Mayol nagsugod na karon sa iyang workout ug jogging didto sa Estados Unidos human mahingpit ang kontrata.

Karong adlawa, si Mayol mopahigayon og sparring session batok sa wala hinganling undefeated Mexican boxer didto sa nabantog nga Wild Card Gym sa Los Angeles ubos sa giya sa iyang trainer nga si Jeremiah Quijano.

Si Mayol milampos pag-ilog sa WBC title human niya gipilde ang Mehikanong si Edgar Sosa niadtong Nobiyembre 21 didto sa Mexico.

Wala hinuon giisip ni Mayol nga usa ka yanong kontra ang kanhi world titlist nga si Romero, kinsa mipukan sa pipila ka mga Pinoy'ng boksidor sama nila Juanito Rubillar ug IBF junior flyweight titlist Brian Viloria.

Ang kanhi ALA fighter nga si Mayol, kinsa anaa na karon nagpalandong sa MP Promotions ni Manny Pacquiao, nagbitbit og 26-4, 20KOs win-loss record, samtang si Romero adunay record nga 28-3, 11KOs. – BANAT NEWS