T. Padilla, Mabolo milubong sa ilang kontra

CEBU, Philippines - Parehong mikutlo og daog ang T. Padilla ug Mabolo human gipanglubong ang ilang tagsa-tagsa ka kaatbang sa 40-above division sa Cebu City My City Games niadtong miaging adlaw diha sa Brgy. Ramos Gym, ning siyudad.

Ang T. Padilla midemolis sa San Roque sa iskor nga 100-86, samtang ang Mabolo nimasaker sa Tejero sa iskor nga 80-68.

Miarangkada dayon ang T. Padilla sa pagpangulo  nilang Jose Erly Pilapil, Eddison Ferraren ug Vicente Rosaroso aron pagposte og 10 puntos nga bentaha sa halftime, 46-33.

Gamit ang balanseng atake sa T. Padilla, miburot ang maong labaw ngadto na sa 14 puntos paghuman sa third quarter, 71-57. 

Wala mahitsura ang duwa sa San Roque dihang ang T. Padilla mipauwan og lima ka three points nga maoy miwaswas sa kadaugan.

Si Pilapil maoy topscorer sa T. Padilla nga miburak og 18 puntos, gisundan ni Rodrigo Cañete nga adunay 15 puntos ug si Rosaroso miabuno og 13 puntos.

Ang naparot nga San. Roque gipangulohan ni Rommel Jacalan, kinsa mipabuhagay og 26 puntos, samtang si Ryan Ramas miamot og 17 puntos ug si Oscar Rosell mitampo og 10 puntos.

Sama sa T. Padilla, nagpungasi usab ang opensiba sa Mabolo diin upat sa mga magduduwa ang mirehistro og double digits alang sa ilang kadaugan.

Si Gilbert Gajudo mipusa og 12 puntos ug sila si Stevenson Dajalos, Alfredo Leyson ug Elmer Cui miamot og 10 puntos matag usa alang sa Mabolo.

PUNTOS MATAG USA

Unang duwa:

T. Padilla (100) - Pilapil 18, Canete 15, Rosaroso 13, Ferraren 10, Villamia 10, Solon 8, Arnado 6   

San Roque (86) - Jacalan 26, Ramas 17, Rosell 10, Anor 8, Del Mar 5, Casinillo, 3, Cabilan 2, Mendoza 2

Ikaduhang duwa:

Mabolo (80) - Gajudo 12, Dajalos 10, Cui 10, Leyson 10, Gamancial 6, Torrifiel 6, Ching 6, Rita 2

Tejero (68) - Sejudo 15, Lim 10, Morata 10, Ramil 6, Baldago 4, Salcedo 4, Paca 2, Galachu 2, Ocampo 1    (BANATNEWS)