Pacquaio, kagahapon ug karun

CEBU, Philippines - Gihangad karon isip labing kusgan nga boksidor sa tibuok kalibutan si Emmanuel Pacquiao o gitawag karon sa bansagun nga “Pacman”, nahimong usa sa mga sikat nga personalidad dili lang sa natad sa boksing, apan lakip na sa showbiz ug politika.

Natawo didto sa Kibawe, Bukidnon apan nagdaku sa General Santos, si Pacquiao uban karon sa iyang kapikas nga si Jinkee ug upat nila ka mga anak nga sila si Jemuel, Michael, Queen Elizabeth ug Princess.

Unang world title nga gisakmit ni Pacquiao mao ang WBC flyweight belt dihang gipatumba niya ang Thai nga si Chatchai Sasakul sa round eight, apan mas misikat si Pacquiao dihang misaka siya ngadto sa 122 lbs division ug giilog ang IBF super bantamweight gikan sa kamot sa Aprikanong si Lehlohonolo Ledwaba didto sa Las Vegas.

Ang maong away mao usab ang unang higayon nga nag-uban si Pacquiao ug ang Amerikanong trainer Freddie Roach. Didto nagsugod ang ilang lig-on nga tandem sa nabantog nga Wild Card Gym sa Los Angeles, California.

Niadtong Nobiyembre 15, 2003, giatubang ni Pacquiao ang unang hagit sa iyang karera diin gikaharong niya ang usa sa mga ngilngig nga Mehikanong boksidor nga si Marco Antonio Barrera didto sa Alamodome, San Antonio , Texas .

Sa maong away, walay bisan usa nga nagdahom nga modaog si Pacquiao batok sa beteranong si Barrera, apan gipakuratan sa Pinoy ang tibuok kalibutan dihang gilat-an niya ang Mehikanong kampiyon ug gipilde pinaagi sa technical knockout sa round 11.

Ang Pacquiao-Barrera fight mao ang usa sa labing sikat nga upset niadtong tuiga ug didto hinay-hinay nga misulbong ang pangalang “Pacman” sa international boxing.

Sunod ni Barrera, migimaw ang laing Mehikano nga si Juan Manuel Marquez, kinsa niadtong tungora mao ang WBA ug IBF featherweight champion.

Mao usab kadto ang sinugdanan sa panagribal nilang Pacquiao ug Marquez human sa controversial draw sa una nilang away diin gipatumba sa Pinoy ang Mehikano sa round 1 sa makaduha ka higayon.

Nahimo usab kadtong fight of the year tungod sa gipakita kabangis sa duha ka boksidor nga nagsinukliay og kumo gikan sa pagsugod hangtod sa katapusang hut-ong sa away.

Hinuon, wala nagkasinabot ang duha ka kampo nga himuon ang usa ka rematch, apan nakahukom ang kampo ni Pacquiao nga mosaka gikan sa 126 ngadto sa 130 lbs. aron atubangon ang laing respetadong Mehikanong boksidor nga si Erik Morales.

Sa una nilang sangka, gipakita sa Mehikano nga dili siya basta-basta nga boksidor dihang gidominaran niya ang away ug gipahamtangan si Pacquiao og kapildihan pinaagi sa unanimous decision.

Wala hinuon hikawi ni Morales ang rematch nga gipangayo ni Pacquiao, apan wala siya magdahum nga ang gihatag niyang kahigayonan mao ang mobutang kaniya sa alaot. Atubangan sa liboan ka mga boxing enthusiats didto sa Thomas and Mack Center sa Las Vegas, nanimawos si Pacquiao dihang gipatumba niya si Morales sa labing unang higayon sa iyang karera.

Wala madugay, gisunod dayon ang ikatulo ug katapusang pahina nga maoy motak-op sa usa sa mga makasaysayong panagribal sa natad sa boxng, niining higayona, hingpit nga gipamatud-an ni Pacquiao nga siya maoy mas kusgan dihang gipaluhod niya pag-usab si Morales sa third round.

Sa maong kadaugan, gibayaw si Pacquiao sa HBO ug Ring Magazine isip “Fighter of the Year” ug giila isip labing kuyaw nga boksidor sa iyang henerasyon.

Nagmalampuson usab ang misunod niyang mga rematch tali nila ni Barrera ug ni Marquez nga maoy hinungdan nga gihulagway siya isip “Mexicutioner”.

Hinuon, kun unsa ka malampuson si Pacquiao ibabaw sa lona, pakyas hinuon siya pag-knockout sa iyang mga kontra sa politika.

Niadtong Mayo 17, 2007, unang misakbang si Pacquiao sa kalibutan sa politika.Si Pacquiao kinsa usa sa mga taga-suporta sa administrasyon ni presidente Gloria Macapagal-Arroyo midagan isip kandidato pagka-kongresista sa General Santos ubos sa partido sa Lakas-CMD, apan napilde batok sa incumbent congresswoman Darlene Antonino Custodio kinsa milubong kaniya og 37,000 ka botos atol sa election.

Ang makauuwaw niyang gidangatan sa politika, gigamit hinuon sa pambansang kamao nga inspirasyon aron mas palambuon pa ang iyang karera sa boxing.

Sama sa iyang desisyon nga mudagan sa election, giisahan usab sa kilay sa mga boxing experts ang desisyon sa kampo ni Pacquiao nga dawaton ang hagit sa legendary boxing icon nga si Oscar De La Hoya alang sa usa ka sangka niadtong miaging tuig.

Daghan ang nakugang sa hukom ni Pacquiao nga suklan ang mas daku nga si De la Hoya ubos sa 147 lbs. division.

Sa iyang bahin, ang hall of famer trainer nga si Freddie Roach mipakita sa iyang dakung kompiyansa  sa iyang batos human mibahad nga pildihon ni Pacquiao ang mas daku nga si  De la Hoya, kini bisan pa man og nakita sa pustaanay didto sa Las Vegas nga mas gipaboran sa kadaghanan nga modaog si De La Hoya.

Wala mauwawi si Roach dihang atol sa sangka niadtong Disyembre 6, 2008 didto sa MGM Grand Garden Arena, gipahunong na usab ni Pacquiao ang kalibutan dihang iyang gidabo-dabohan si De la Hoya, kinsa napugos pag-undang sa away sa ninth round tungod sa grabeng bun-og nga iyang nawong.

Gikan didto, misulbong ang ngalan ni Pacquiao kinsa maoy gitawag nga bag-ong “world pound-for-pound king”. Ang kadaugan usab sa pambasang kamao batok ni De la Hoya mao usab ang naghatag kaniya og daghang advertisement offers gikan sa mga dagkung kompaniya sa sud ug gawas sa nasud.

Gawas pa niini mibulsa usab siya og $30 million nga bahin sa kita sa "pay-per-view" ug bahin niya sa $17 million nga kita sa tickets nga maoy labing daku sa kasaysayan sa boxing didto sa Las Vegas .

Sunod nga nasaytan ni Top Rank Inc. big boss Bob Arum kinsa maoy promoter ni Pacquiao mao ang British champion nga si Ricky “Hitman” Hatton aron maoy sunod nga iparang sa iyang batos.

Human mahikay ang kasabutan, way paglangan nga gitakda dayon ang away niadtong Mayo 3, 2009. Didto gipakita ni Pacquiao nga dili tsamba ang iyang daog batok ni De la Hoya dihang usa ka makalilisang nga second round knockout ang iyang gipahamtang ngadto ni Hatton.

Ang iyang kalampusan batok ni Hatton mihimo usab niya nga labing unang Asian boxer nga nidaog og unom ka world title sa managlahing dibisyon human napunta kaniya ang IBO ug Ring Magazine light welterweight title gikan ni Hatton.

Tungod sa duha ka dominanteng away nalagpot sa numero unong luna sa lista sa mga dekalibreng boksidor sa kalibutan si Pacquiao, apan mas nahimong mas interesable ang boxing lakip na ang karera sa pambansang kamao dihang mihaw-as gikan sa retirement ang kanhi pound-for-pound king nga si Floyd Mayweather Jr.

Nahugyaw ang mga boxing enthusiasts sa pagbalik ni Mayweather Jr. tungod kay siya karon ang gitupo sa kadaghanan aron sangkaon ni Pacquiao.

Hinuon, wala dayon gitukob sa duha ka kampo ang posibilidad nga mahitabo ang away. Si Pacquiao mipili hinuon sa laing tang-ang boksidor sa welterweight division nga si Miguel Cotto isip sunod niyang kontra.

 Ning higayona, si Pacquiao mao ang migawas nga inilog kontra sa Puerto Rican champion ug sama sa gitagna sa kadaghanan mipatigbabaw na usab ang katakus sa pambansang kamao dihang iyang gilupig pinaagi sa 12 round knock-out si Cotto aron makuha ang WBO welterweight title nga maoy mipanday sa iyang ngalan sa kasaysayan sa boksing nga bugtong boksidor nga nakaangkon og pito ka world title sa managlahing dibisyon.

Si Arum nagkanayon nga si Pacquiao na ang usa sa mga labing ngilngig nga boksidor nga natupngan na ang mga legendary boxers nga sila si Muhammad Ali ug Sugar Ray Leonard.

Ang katapusang away ni Pacquiao niadtong Nobiyembre 15, mikita og 1.25 million nga pay-per-view buys, diin nabahinan si siya og $22 million.

 Tungod sa nagkasikat niyang pangan dili lang isip boksidor, gihamuk usab og intriga si Pacquiao sa pagsulod niya sa kalibutan sa showbiz, ning bag-o gidungug ang relasyon nila sa sexy starlet nga si Krista Ranillo nga mitay-og sa relasyon niya sa iyang asawa ni Jinkee.

Hinuon si Pacquiao daling mihimakak nga aduna sila'y relasyon ni Ranillo ug midepensa nga suod lang niya nga higala ang aktres kinsa kauban niya sa umaabot niyang pelikula nga “Wapakman”.

Subli usab nga mosugal si Pacquiao sa natad sa politika karong nagsingabot nga 2010 eleksiyon nga magpapili pagka kongresista sa Sarangani Province diin iyang atubangon ang iladong negosyante sa maong lalawigan nga si Roy Chiongbian.

complete