CEBU, Philippines - Gilat-an sa Mawin's Kitchenette ang Ritchie squad, 91-83 aron pagsakmit sa korona sa JS Contractors' Cup basketball tournament diha sa Don Vicente Sotto Memorial Gym sa Brgy. Punta Princesa, ning siyudad.
Nakanindot kay ang Mawin's Kitchenette misakmit sa titulo pinaagi sa 10-0 sweep.
Sikit kaayo ang duwa gikan sa pagsugod hangtod sa third period diin igo lang nakamaneho og uno punto nga labaw ang Ritchie sa iskor nga 68-67, apan ang Mawin’s nakarekober pagsugod sa fourth period ug miilog sa momentum luyo sa paningkamot ni Reginald Taborada
Tulo ka three-point bombs ang gipabuto ni Taborada sa nahabiling 3:46 sa fourth period nga maoy mibungkag sa depensa sa Ritchie.
Si Taborada maoy topscorer sa Mawin's pinaagi sa iyang 23 puntos. Ang kanhi USC Warrior nga si Bong Eleazar miamot og 22 puntos, samtang si Sherwin Lequit ug Mat Vallejo miabuno og 12 puntos matag usa alang sa Mawin’s.
Ang Ritchie gipangulohan ni Sheila Gonzales, kinsa miburak og 22 puntos.
Sa sayo pa, ang Victor Village misakmit sa ikatulong dapit pinaagi sa pagbugwal og 88-85 nga kadaugan batok sa Soil Guard.
Si Inting Rabadon maoy nangu sa Victor Village nga miburak og 29 puntos, samtang si Anthony Capacio mi-iskor sab og 29 aron pangulohan ang Soil Guard.
Puntos Matag Usa
Mawin’s (91) - Taborada 23, Eleazar 22, S. Lequit 12, Vallejo 12, Sanding 8, Cabahug 5, Lequit 4, Pineda 3, Empenado 2
Ritchie (83) - Gonzales 22, Paguntalan 12, Jayme 11, Demecillo 7, Padigos 7, Poblete 7, Concepcion 6, Batiquin 5, Tojoy 2, Z. Canencia 2, M. Canencia 2. – BANAT NEWS