CEBU, Philippines - Gilig-on og maayo ni David G. Lim sa Team DGL ang iyang estado isip numero unong car racer sa nasud human niya giharos ang walo ka title nga nakahimo kaniyang "Driver of the Year" sa 2009 Philippine Autocross Championship Series.
Ang mga outstanding achievers sa five-leg series gipasidunggan atol sa awarding ceremony niadtong miaging gabii diha sa Parkmall.
Si Lim mitali og 44 puntos aron dag-on ang labing taas nga award human niya gipilde ang iyang teammate nga si Mato Tan.
Sila si Jess Garcia ug Justin Neri sa Kartzone maoy mi-okupar sa ikatulo ug ikaupat nga dapit nga mihipos og 32 ug 23 puntos, samtang si Jong King sa No Care Racing napunta sa ikalima nga mitigom og 22 puntos.
Mikompleto sa top 10 finishers mao sila si David Lim, Jr. (17 pts.), Randy Paray (11 pts.), Philip Khan Lim (7 pts.), Derek Arculli (5 pts.) ug Blake Go (5 pts.).
Si David Lim mao sab ang nanghawod sa novice modified A, B ug C ug ingon sa experienced modified B ug C, open B ug C ug sa all-wheel drive.
Wala sab magpaulahi ang iyang anak nga si David Jr. dihang nidaog kini og duha ka korona kortesiya sa experienced modified A ug sa open A.
Sila si Philip Khan Lim, Dennis Corro ug Bobby Pangilinan sa Team NCR mipakita sab sa ilang kahanas sa pagmaneho og sakyanan. Si Lim naghari sa novice stock A category, si Corro nidaog isip labing maayo sa old-school, samtang si Pangilinan nanghawod sa rear wheel drive.
Si Ervin Go maoy nidominar sa novice stock C ug automatic transmission, si Charlie Pages maoy nag-una sa all-BMW.
Ang top three sa sports car bracket mao sila si Ervin Go, Alan 'Big Al' G. Choachuy ug Bobby Pangilinan.
Si i Louie Blanco maoy hawod sa Papa Joe's class. (BANATNEWS)