5 Cebuano weightlifters ibala sa SEAG

CEBU, Philippines - Lima ka Sugbuanong weightlifters nga gipangulohan nilang Renante Briones ug Christopher Bureros ang modala sa ngan sa Pilipinas alang sa 25th Southeast Asian (SEA) Games nga sugdan karong Miyerkules didto sa Laos.

Ikatulo na kining higayon nilang Briones ug Bureros nga nalakip sa RP Team, kinsa mangahas og kabkab og bulawan batok sa mga dekalibreng weightlifters gikan sa Indonesia, Malaysia, Thailand ug Laos.

Mokompleto sa line-up sa nasudnong koponan mao sila si Kelle Kay Rojas ug Angelica Lado sa University of San Jose-Recoletos/Aliño Integrated Services ug Joselito Padilla sa University of Cebu-Baseline.

Si Briones motigi sa 94 kilograms division, si Bureros sa 85 kgs. category, samtang si Padilla mao ang pambato alang sa 105+ class. Sila si Rojas ug Lado, kinsa pulos first timer sa SEA Games, mobanat sa 48 ug 75+ divisions.

Ang kanhi Olympian ug RP coach nga si Ramon Solis nagkanayon nga hayag ang kahigayonan sa mga Sugbuanon nga modaog og medalya basi sa gipakita nilang katakus sa miaging National 5-in-1 Weightlifting Championships didto sa Bohol diin ilang gibuak ang mga rekord.