13 ka paresan magtigi sa Mixed Martial Arts
CEBU, Philippines - Trese ka parisan sa mixed martial artists ang magpinaksitay sa Extreme Combat Sports and Fearless Fighting Championship: “Octagon of Fury” karong Sabado sa gabii diha sa Mandaue City Cultural and Sports Complex.
Duha ka mga tang-ang fighters gikan sa Manila nga sila si Arex Montalban ug Cesar Yarte mao ang mopakita sa ilang katakus sa main event.
Ang kanhi PBF lightweight champion nga si Montalban mosuway pagpatumba sa MMA middleweight slugger nga si Yarte, kinsa nagtinguha nga mokulit og daog sa labing unang higayon dinhi sa Sugbu.
Sa supporting main event, ang Sugbuanong si Kid Oraiz mosukod usab sa abilidad ni Leonardo Delarmino sa Iloilo.
Gawas ni Oraiz, laing 15 ka Sugbuanon ang makigbinukbukay batok sa mga bisitang martial artists gikan sa Bohol, Bacolod ug Iloilo sa 119 lbs. ngadto sa 149 lbs. weight divisions.
Lakip sa mga Cebuano MMA fighters mao sila si Michael Arquillano, Romelo Espera, Pablo Santillan, Roy Colina, Michael Gesta, Edward Manteza, Eric Regalado, Junje Abellana, Johnjier Torbiso, Marvin Gambal, Dods Balansag, Emmanuel Sevilla, Nino Vincent Armecin ug Danilo Teves.
Ang official weigh-in himuon karong alas-9 sa buntag diha sa Banilad Town Centre.
Ang mga tiket sa maong kulbahinam nga aksiyon nagkantidad og P300, P200, P100. – BANAT NEWS
- Latest
- Trending
