Lahug mo-host sa 'Paboksing sa Barangay' karong gabii

CEBU, Philippines - Mag-abot na sab ang dalan sa duha ka karibal nga stable, ang Cebu City Sports Center (CCSC) ug Omega Boxing alang sa laing hut-ong sa Cebu City Amateur Developmental Tournament, "Paboksing sa Barangay 2009” karong gabii diha sa PC Compound Brgy. Lahug, ning siyudad.

Mga boksidor gikan sa CCSC stable ug Omega Boxing magpinaksitay ubos sa 25kgs., 38kgs., 40kgs., 45kgs., 50kgs, 52kgs., 57kgs. ug 63kgs. divisions.

Mangulo sa CCSC stable mao ang managsuong Ardie ug Eran Boyose, uban nilang Alil Ala, Jay-R Barroma, Ramjess Colinas, Ian Refuella ug Allan Refuella.

Samtang ang Omega Stable moparada sa ilang batalyon gikan sa siyudad sa Mandaue nga pangulohan sa ilang pambato sa 51kgs. division nga si Jonas Sultan.

Gawas sa CCSC ug sa Omega Boxing stables, gipaabot sab nga mosalmot ang mga amateur boxers gikan sa CBA Stable (kanhi LOSAMBA Stable), Sanai Gym, Bogo Stable ug Talamban boxers.

Gipasiugdahan sa Cebu City Sports Commission, ang kalihukan gipaluyohan sab sa Cebu City Government ubos sa liderato ni Mayor Tomas Osmeña. – BANAT NEWS