Politika ni Pacquiao suliran ni Arum

CEBU, Philippines - Nabalaka karon si Top Rank Inc. big boss Bob Arum nga madiskarel ang mga umaabot niyang plano sa kaugmaon sa pamuksing ni Manny Pacquiao human mihukom nga mosulod sa kalibutan sa politika.

Nagkanayon si Arum nga nagdepende karon sa dagan sa karera sa pamolitika ni Pacquiao ang katumanan sa mga nag-ung-ong niining dagkung away lakip na ang giplanohang megafight nila ni Floyd Mayweather Jr. sa sunod tuig.

Ang Pinoy boxing icon miduso na sa iyang sertipiko de kandidatura kagahapon. Si Pacquiao magpapili pagka-kongresista sa Sarangani Province.

Sa interbiyu sa Los Angeles Times, si Arum nagkanayon nga gawas sa isyu sa bahinay sa kita, nahimo na usab nilang suliran karon ang mahitungod sa gubot sa pagpili sa schedule kun kanus-a gyud mahitabo ang Pacquiao-Mayweather Jr. showdown.

Sumala pa ni Arum nga wala sila'y problema kun segurado na si Pacquiao nga modaog pagka-kongresista tungod kay gamay nga oras sa pagpangampanya na lang buhaton sa pambansang kamao aron mahitabo ang iyang away sa sayong bahin sa tuig 2010.

Hinuon, si Pacquiao atbangan usab sa manghod ni Sarangani incumbent congressman Erwin Chiongbian nga si Roy Chiongbian, kinsa usa ka inilang businessman sa maong probinsiya. - Lemuel P. Maglinte (BANAT NEWS)