CEBU, Philippines - Milampos ang defending champion UTASSCO Utility sa ilang tinguha pagdepensa sa ilang korona human sila mo-abante pagbalik sa finals pinaagi sa ilang 80-70 nga kadaogan batok sa www.fedguns.com.ph sa crossover semifinals kaniadtong Martes sa gabii sa nagpadayong Power Forty Christmas League basketball tournament didto sa Inayawan Sports Complex.
Maoy makontra sa UTASSCO ni Atty. Flor Yosores ang Park N' Go Bakeshop nga gipangulohan ni Romy Rama kinsa mi-abante sab sa finals human ilang giyabo ang Water Market ni kanhi Power Forty president Vez Eleguin sa iskor, 110-95.
Sugdan ang best-of-three finals tali sa UTASSCO ug Park 'N Go sa sunod Martes, Disyembre 1.
Bisan pa og matapos og sayo ang torneyo, ang awarding ceremony unya ra pagahimoon atol sa Power Forty Christmas party.
Ang fedguns ug ang Water Market maoy mag-ilog sa ikatulong pwesto sa laing best-of-three series ugmang adlawa.
Miantug og maayo si Atty. Yosores kinsa maoy nangu sa ilang opensa pinaagi sa iyang 16 puntos samtang parehong midugang og 10 puntos sila si Alex Mercado ug Joey Escalon alang sa UTASSCO.
Miburak og 20 puntos si Rey Mabalcon, si Rudy Abadejos may 12 puntos ug pareho sab mi-iskor og 10 puntos sila si Tata Cabanero ug Dads Ramil.
Sa laing bahin, giharian sab og maayo si Romy Rama diin mi-iskor siya'g career-high 31 puntos ug si Michael Arias mitampo og 24 puntos. Laing tulo ka kauban mi-iskor sab og double figures.
Si Gideon Bughao maoy nangu sa opensa sa Water Market pinaagi sa iyang 29 puntos ug si Eleguin miamot og 19 puntos. Mi-iskor og 13 ug 12 puntos matag usa sila si Edwin Dejacto ug Alan dela Rama samtang may 10 puntos si Sim Yosores.
Puntos matag usa:
Unang Duwa:
UTASSCO (80) — Yosores 16, Mercado 10, Escalon 10, Labajo 8, W. Cabrera 8, Yu 6, Btac 6, Nacional 6, B. Cabrera 6, Pestano 4
fedguns (70) — Mabalcon 20, Abadejos 12, Cabanero 10, Ramil 10, Ibones 8, Abarquez 6, Villoga 4
Ikaduhang Duwa:
Park 'N Go (110) — Rama 31, Arias 24, Atillo 11, Layon 10, Echavez 10, Ozon 9, Bacalso 5, Lalican 4, Dimitiman 4,
Water Market (95) — Bugho 29, Eleguin 19, Dejacto 13, Dela Rama 12, Yosores 10, Abellana 5, Dacalos 4, Cayacap 2. – GGM (BANAT NEWS)