Niños, ikaw ang no. 1

CEBU, Philippines - Naangkon sa M. Lhuillier Kwarta Padala-Cebu Niños ang no. 1 spot human nila gilubong ang defending champion Misamis Oriental Meteors, 78-54 sa Liga Pilipinas Conference 3 “Super Leg” kagabii diha sa Cebu Coliseum.

Ang Cebu Niños ni Michell Lhuillier ug multi-titled coach Raul 'Yayoy' Alcoseba nagpabiling walay pilde sa 19 nila ka duwa sukad gisugdan ang elimination round hangtod na sa Super Leg, diin mikulit sila og 3-0 record nga maoy mihatod kanila ngadto sa finals.

Gumikan sa tinguha nga moabante sa finals, nahimong pisikal ang duwa sa duha ka kampo diin mipatuman kini og hugot nga depensa, apan ang Niños nakahigayon gihapon pagposte og sayes puntos nga labaw sa first period, 13-7.

Dali hinuong nakahimo'g adjustments si coach Alcoseba aron bungkagon ang depensa sa Meteors ni coach Jun Noel.

Si Mark Magsumbol, kinsa miposa og tulo ka three-point shots maoy migiya sa Niños alang sa ilang 17 puntos nga labaw sa halftime, 38-21.

Misamot kagusbat ang duwa sa Meteors dihang ang Niños sa kombinasyon nilang Woodrow Enriquez, Ian Saladaga ug Bruce Dacia milusad og 20-9 run sa tunga-tungang bahin sa third period.

Si Magsumbol maoy topscorer sa Niños sa iyang 16 puntos, samtang laing tulo niya ka teammates ang mirehistro usab og double-digits nga naglakip ni Basco nga adunay 13 puntos, Enriquez ug Saladaga nga miabuno og 10 puntos matag usa.

Ang pilderong Meteors gipangulohan sa ilang guwardiya nga sa Khiel Misa, kinsa igo lang mi-iskor og nuybe puntos.

Puntos Matag Usa

CEBU (78) - Magsumbol 16, Basco 13, Saladaga 10, Enriquez 10, Dacia 8, Ababon 6, Padilla 5, Santos 4, Nailon 4, Mepaña 2

MIS.OR (54) – Misa 9, Saldua 8, Lamucha 8, Moreño 8, Mamaclay 7, Tagupa 3, Mente 3, Kong 3, Butel 2, Daja 2, Clavel 2.  – BANAT NEWS