Mang Inasal vs Heartvit

CEBU, Philippines - Nahimong bayani si Glen Besanes sa Mang Inasal human sa iyang krusyal nga follow-up batok sa Heartvit, 81-80 sa nagpadayong Punta Princesa Ball Club (PPBC) 2009 Vice Mayor Mike Rama Cup basketball tournament diha sa Vicente Sotto Memorial Gym sa barangay Punta Princesa, ning dakbayan.

Si Besanes mihipos lang og 12 puntos, apan ang iyang follow-up shot maoy nagsalbar sa Mang Inasal nga nagbitbit karon og 3-2 win-loss record.

Si ex-pro Lou Regidor maoy topscorer sa Mang Inasal nga adunay 22 puntos, gisundan ni Carlos Porras sa iyang 20 puntos.

Sayong mi-arangkada ang Mang Inasal sa pagpangulo nilang Regidor ug   Porras aron pagkulit og 67-57 nga abante paghuman sa third period.

Apan bisan sa taudtaud nilang kahilom, mihinay-hinay og kamang ang Heartvit sa fourth period hangtod nga ilang natabla ang duwa sa iskor, 75-all sa katapusang dos minutos ug nailog pa nila ang labaw sa labing unang higayon, 77-76 human sa duha ka free throws ni Fred Lim.

Naglawig na unta ang Heartvit sa kadaugan human milabaw og dos puntos, 80-79, apan si Besanes mihimo og mabayanihong buhat pinaagi sa follow-up shot gikan sa sipyat ni Regidor dungan sa paghuni sa buzzer.

Sa sayo pa, ang J-Art naka-eskapo sab bitbit ang 102-97 nga kadaugan batok sa Wilkris ni team owner Gideon Cabatingan.

Si team owner Jimbo Noel maoy topscorer sa J-Art sa iyang 34 puntos, samtang si Glen Birao miamot og 20 puntos.  

PUNTOS MATAG USA

Unang duwa:

J-Art (102) - Noel 34, Birao 20, Ferrer 15, Perez 12, Tecson 8, Mante 6, Pda 3, Vilaver 2, Gonzaga 2

Wilkris (97) - Canedo 26, Anadon 22, Magan 17, Sta. Iglesia 10, Arias 7, Monreal 6, Gaviola 6, Cabatinhan 2, Maneja 1

Ikaduhang duwa:

Mang Inasal (81) - Regidor 22, Porras 20, Besanes 12, Jmawan 10, Barreto 6, Hernadez 5, Chiong 4, Pena 2

Heartvit (80) - Lim 16, Jumamel 15, Y. Reyes 15, Zamora 12, Sanchez 8, Babatid 8, C. Reyes 2, Tagalog 2, Mosqueda 2 (BANATNEWS)