Lado midaog tulo ka bulawan

CEBU, Philippines - Ang Sugbuanong weightlifter nga si Angelica Lado sa University of San Jose-Recoletos (USJ-R) midaog og tulo ka gold medals sa 2009 National Women’s Youth Weightlifting Championships sa miaging adlaw didto sa Tagbilaran City.

Si Lado nanghawod sa tulo ka dibisyon sa open, collegiate ug junior categories.

Si Lado, kinsa mialsa og 180 kilograms, mi-iskor og 20 puntos matag category nga iyang gisalmotan aron pagpukan sa bugtong niyang kaatbang nga si Tara Mae Canazares gikan sa Zamboanga City, kinsa igo lang mialsa og 110 kilograms.

Gawas kang Lado, ang laing mihakot og tulo ka gold medals mao si Hidilyn Diaz gikan   sa Zamboanga City, kinsa maoy nanghawod sa open, collegiate ug juniors sa 190 kilograms. Ang iyang teammate nga si Leah Joy Pasanting midaog og silver medals sa juniors ug collegiate categories ug bronze sa open category ug ang laing taga- Zamboanga nga si Marlyn Napolereyes maoy midaog sa silver. Apan si Napolereyes   midaog og duha ka golds sa secondary ug youth categories pinaagi sa iyang 17 puntos sa   127 kgs.

Ang 13-anyos lifter nga si Patricia Nina Gregorio, maoy nakapadani sa katawhan dihang midaog siya’g duha ka golds sa 40 kilograms ug sa 58 kilograms, samtang ang 18-year old nga Sugbuana gikan sa USJ-R nga si Kelie Kay Rosas maoy midaog sa gold sa 48 kilograms sa junior ug sa open categories.

Si Rizzhelle Dane Agustin sa Zamboanga midaog og duha ka golds sa youth ug sa secondary categories, samtang si Ethel Garcia sa Guagua National College sa Guagua, Pampanga maoy midaog sa gold sa collegiate ug open categories sa 63 kgs. division.

Si Patricia Llena sa LWC midaog og gold medal sa open category sa 69 kgs. ug sa youth 63 kgs. categories, samtang si Maybelyn Pablo sa Zamboanga midaog og gold sa secondary division.

Ang manghod ni Llena nga si Lea Ruth midaog sab og duha ka gold medals sa open ug youth categories sa 53 kgs. samtang sila si Jeanette Mendoza ug Elatarma Cardano maoy midaog sa collegiate ug juniors categories.   (BANATNEWS)