Lopez, Delos Santos manalipod sa ilang titulo sa Running MAD 2

CEBU, Philippines - Ang ikaduhang hut-ong sa Running MAD nga nagdala og tema nga “Smart is the New Sexy” mosikad karong Nobiyembre 22 diha sa UP Lahug grounds sa Lahug, ning siyudad.

Aduna kini tulo ka kategoriya -- 3K, 6K ug 12K Open.

Si Lahug Brgy. Capt. Mary Ann delos Santos, kinsa maoy mipasiugda sa maong lumba nagkanayon nga sama sa miaging hugna sa Running MAD, tumong   nila karon nga i-promote ang paghatag og bili sa kapiskay sa lawas pinaagi sa dagan.

Si race director ug The Freeman sports columnist   Raffy Uytiepo mipahibalo nga gamay lang nga kausaban ang ilang gihimo alang sa lumba.

Matud ni Uytiepo nga bugtong gihatagan nila karon og pagtagad mao ang pagpakatap og igong mga water stations ug kahapsay sa trapiko alang sa mga runners ilabi na niadtong modagan sa 12K.

Lakip sa mga managan sa 12K mao sila si defending champions Mendel Lopez ug Mary Grace Delos Santos. Modagan sab sila si Madelyn Carter, Joeyry Ann Lee, ang Guardo Running Club nga gipangulohan ni Jonathan 'Atan' Guardo. – BANAT NEWS