CEBU, Philippines - Pormal na nga gilusad sa Cebu Tourism and Travel Association (CTTA) ug Cebu Association of Tour Operators (CATO) ang 1st Tourism Eco-Fun Run “Go for Green” nga gikatakda karong Nobiyembre 29 diha sa Asian Town I.T Park sa Lahug, ning siyudad.
Sa press conference kagahapon diha sa Gumamela Room sa Marriot Hotel, ang presidente sa CTTA nga si Cookie Chan nagkanayon nga tumong sa maong lumba mao ang pagtigum og pundo alang sa environmental projects nga ilang ipatuman sa nagkadaiyang probinsiya sa Sugbu, lakip na usab ang pag-promote sa Sugbu isip usa sa mga tourist spots.
Sa iyang bahin, si race director Joe Deresas mipahibalo nga ang maong lumba gibahin sa tulo ka kategoriya – 3K Open, 5K Open, 5K Media ug 10K Open.
Matud pa ni Deresas kapin na sa usa ka libo kapin ka runners gikan sa nagkadaiyang Travel agencies ug mga kawani sa hotels dinhi sa Sugbu ang mikompirmar sa ilang partisipasyon.
Ang project director sa maong lumba nga si Hembler Mendoza nagkanayon nga dili lang ang mga dekalibreng runners dinhi sa Sugbu ang ilang gidapit, gilakip usab nila ang mga turista nga buot modagan.
Gipahibalo ni Chan nga usa sa ilang mga dinapit sa maong lumba mao si Department of Tourism Secretary Joseph 'Ace' Durano, kinsa mipadayag sa iyang dakung suporta sa maong lumba.
Ganting salapi ug medalya ang nagpaabot niadtong palarang mga mananaog.
Ang kampiyon sa 10K makadawat og P7,000, ang kampiyon sa 5K mobulsa og P3,000 ug ang modaog sa 3K makadawat og P1,500.
Ang mga runners may kahigayonan sab nga modaog og round trip tickets sa local
ug domestic flights atol sa
raffle.
Ang registration sugdan karong Nobiyembre 4 diin aduna kini registration fee nga P180 libre na ang singlet ug race number.
Ang registration areas nahimutang sa Southwind Travel and Tours sa JY Square, Lahug, Adventure International sa Ayala Mall, Grand Hope Travel and Tours sa SM City-Cebu, Grand Hope Ventures sa Fuente ug Pan Pacific Travel sa Ramos. – BANAT NEWS