Visayas kampiyon sa 1st Milo National Finals

CEBU, Philippines - Wala usiki sa Visayas ang kahigayunan nga mokampiyon sa kaugalingon nilang balwarte, dihang nangharus sila sa katapusang adlaw aron masakmit ang titulo sa National Milo Little Olympics kagahapon diha sa Cebu City Sports Center. Human sa duha ka adlaw nga kumbati, ang Team Bisdak maoy migawas nga over-all champion human sila mirehistro og 621 points, gisundan sa NCR nga mipupo og 551 points, Mindanao nga mihipos og 373 points ug Luzon nga adunay 366 points.

Bisan pa og nagkumbitay sila sa standing niadtong Sabado, namawi ang Team Visayas dihang giharus nila ang nahibiling event sa athletics. Gipalagpot sa Bisdak ang NCR aron masakmit ang titulo sa girls elementary ug secondary division sa athletics, samtang mipahiluna sa ikaduhang luna ang boys elementary ug secondary level sa athletics.

Sila si Sarah Mae Napoles ug Kirstie Kaye Vinco misakmit og duha ka gold medals sa triple jump alang sa Visayas, samtang si Daniel Noval mihatud og laing bulawan human siya mikampiyon sa 100m dash sa secondary level. Ang Team Visayas usab ang first placer sa 4x100m relay sa secondary level.

Ang power-house nga Abellana National School subling mipakita sa ilang katakus dihang gipanitan nila sa finals ang Mindanao, 6-0, aron sakmiton ang kampiyonato sa football.

Sa pakighinabi sa Banat News, ang coach sa football nga si Francis Ramirez nagkanayon nga usa sa rason sa ilang kalampusan mao ang pagsalmut nila sa nagkadaiyang torneyo ug mao kini ang nagsilbe nilang training paingun ngadto sa Milo Nationals.

Gawas sa football, naglawig usab ang Team Bisdak sa table tennis, volleyball, chess, badminton girls, gymnastics ug sepak takraw.

Hinuon, si Ricky Ballesteros, Visayas delegation head, mi-asuy sa Banat News, nga daan na siyang nagtuo nga muratsada ang Team Bisdak sa ikaduhang adlaw tungod kay anaa sa Bisdaks ang mga dekalibreng koponan sama sa sepak takraw sa Abellana National School nga mao usab ang Palarong Pambansa gold medalist.

Sa laing bahin, gidugang ni Ballesteros nga hapsay ang dagan sa maong torneyo ug wala sila makadawat og bisan usa nga protesta gikan sa upat ka koponan nga misalmot ug nagpasabot lang kini nga nagmalampuson ang kinatibuk-ang event.

Human sa duwa, gisunod usab dayun kagahapon ang awarding ceremony diin adunay gipahigayun nga pasundayag agi'g selebrar sa kalampusan sa Milo Nationals didto sa Cebu City Sports Center Oval. – BANAT NEWS