Dili na maliso ang desisyon

CEBU, Philippines - Gibarogan ni Cebu Schools Athletic Foundation Inc. (CESAFI) commissioner Felix O. Tiukinhoy, Jr. kagahapon ang iyang hugot nga desisyon pagsuspenso sa tulo ka magduduwa sa Cebu Institute of Technology (CIT) Wildkittens nga nakit-ang nisulod sa korte nga diriyot magkarambola atol sa Game-1 sa finals batok sa University of San Jose-Recoletos (USJ-R) Baby Jaguars sa miaging Huwebes diha sa Cebu Coliseum.

Sa iyang suwat niadtong Oktubre 23, 2009, si Tiukinhoy nitubag sa apelar ni CIT Athletic Director Alexander P. dela Torre nga nangayo og rekonsiderasyon sa tulo ka magduduwa nga gisuspenso sa nahabiling mga duwa niini nga season.

Matud ni Tiukinhoy, nga ang iyang desisyon pagsuspenso nilang Joseph Nalos, John Merlow Gera ug Carlo Figuracion gibasi sa “Art. F. Conduct of Players, Coaches & Officials Sec 5. Bench Clearing of Players During a Melee sa tuig 2009 Amended CESAFI Rules and Regulations nga nagkanayon:

“Any player or players of a team, coaches, team officials and utility staff who participate in a melee and seen inside the court will be penalized by suspension for the rest of the season.”

Ang maong balaod sa liga nagdili sa mga magduduwa, coaches ug utility staff pagbiya sa ilang tagsa-tagsa ka bench kun adunay kagubot o sinumbagay nga motumaw sa korte. Ug kun kinsa kadtong mosupak sa maong balaod adunay silot nga pagsuspenso.

Ning kasoha, tulo ka magduduwa sa CIT ang positibong giila sa referees nga niyatak gyud sa korte nga maoy nahapakan sa maong silot.

Hinuon, si Tiukinhoy nipadayag nga si dela Torre puwede pang moapelar sa board, apan iyang giklaro nga ang iyang mando pagsuspenso sa tulo ka magduduwa dili na matuis pa.    (BANATNEWS)