Obiena swak sa World Championship

MANILA, Philippines —  Sapat na ang naging performance ni two-time Olympian EJ Obiena sa IAAF Diamond League athletics meet sa Zurich, Switzerland para magkwalipika sa 2027 World Athletics Championships.

Nagkasya lamang sa ikalimang puwesto si Obiena nang magrehistro ito ng 5.90 metro sa kanyang kampanya.

Nagtala rin ng parehong 5.90m si Chris Nilsen ng Amerika. Ngunit nakuha ng American bet ang ikaapat na puwesto via countback at malaglag sa fifth place si Obiena.

Gayunpaman, sapat na ang 5.90m na naisumite ni Obiena upang pormal na makahirit ng tiket sa prestihiyosong World Athletics Championships na idaraos sa susunod na taon sa Beijing, China.

Naghari sa IAAF Diamond League si reigning world champion, Olympic champion at world record holder Armand Duplantis ng Sweden na naglista ng 6.25 metro.

Pumangalawa si Emmanouil Karalis ng Greece na nagtala rin ng impresibong 6.20m habang pumangatlo si Sondre Guttormsen ng Norway na may 6.0m.

Sa kabila ng kabiguang makapasok sa podium, masaya si Obiena sa kaniang performance.

“5.90m here in Zurich… Thank you @weltklassezurich for always hosting such a wonderful competition. With this I also qualified for next year’s World Championship,” ani Obiena sa kanyang post sa social media.

May season best na 5.91m si Obiena sa taong ito na nakuha nito sa Poland.

Magandang indikasyon ito lalo pa’t naghahanda si Obiena para sa 2026 Asian Games na idaraos sa Nagoya, Japan.

Nakatakdang depensahan ni Obiena ang kaniyang korona sa Asian Games.