Slaughter vs. Fajardo

CEBU, Philippines - Magtakus ang duha ka higante nga si 6-foot-11 Gregory Slaughter ug si 6-foot-9 June Mar Fajardo nga maoy masentro sa duwa karong adlawa diin ang eigth-time champion University of the Visayas (UV) Green Lancers moharong sa University of Cebu (UC) Webmasters sa Game-1 sa ilang "best-of-three" finals series sa pagpadayon sa 9th Cebu Schools Athletic Foundation Inc. (CESAFI) basketball season karong gabii diha sa Cebu Coliseum.

Si Slaughter, nga anaa na karon sa iyang katapusang tuig uban sa UV Lancers, gustong magbilin og titulo ngadto sa iyang kaubanan sa dili pa siya mobiya sa koponan, samtang si Fajardo nga mao pay unang pagduwa og finals nagtinguha nga tunolan ang   Webmasters sa labing una nilang korona sa kasaysayan sa CESAFI.

Nagbagat na ang UV ug UC sa best-of-three finals niadtong 2005, apan sila si Slaughter ug Fajardo wala pa niadtong panahona.

Wala na sila mag-abot pag-usab sa mosunod nga tulo ka tuig kay ang Webmasters pakyas pag-abante sa finals.

Ang Lancers nakigsangka batok sa University of San Carlos (USC) Warriors sa makaduha ka higayon niadtong 2006 ug 2007. Sa miaging tuig gipukan sa Lancers ang University of San Jose-Recoletos (USJR) Jaguars sa finals alang sa ilang ikawalong sunod-sunod nga korona.

Sa duha ka higayon niini nga season, si Fajardo mipadala og mensahe ngadto kang Slaughter nga andam na siyang mokabkab og korona karong panahona.

Atol sa ilang unang panagsangka niini nga season niadtong Agosto 2, si Fajardo nangulo sa UC ngadto sa ilang 75-73 nga kadaugan batok sa UV ug ning bag-o, ang West All-Stars ni Fajardo naka-eskapo gikan sa mga kamot sa East All-Stars nga gipangulohan ni Slaughter sa iskor nga 85-84.

Ning ilang ikatulong pagbagat karon gabii maoy mas labing mahinungdanon tungod kay kampiyonato na ang ilang sangkaan. Nagsandig sa duha nila ka dagkung bukton ang tingusbawan sa matag usa nila ka eskuwelahan ug nag-agad kini kun unsang ilang ikapakitang abilidad.

Si Slaughter dili makahimo niining tanan kun wala siya'y mga kaabag sama nilang Harold Cincoflores, Chris Victor Diputado ug Ritchum Dennison lakip na sab nilang Phil Mercader, Mykiel Cabahug ug rookie Ralf Olivares.

Sa habig sa UC, si Fajardo suportahan nilang Moncrief Rogado, Arvin Kim Gomez, Janssen Abella ug Kelvin Juliane.

Sa ilawom, adunay ikapuli kang Slaughter nga sila si Edrian Lao, Mark Anthony Manigque ug Jerome Silva, apan si Fajardo dili kaayo makalaum og timbang sa ilawom tungod kay si Rommel Luceño ang hayan makatabang kaniya sa poste ug dili matabang og daku ang mga rookies nga sila si Mark Tano, Pompeo Miranda ug Jal Anthony Cueva.

Sa laing bahin, ang USC Warriors nagkinahanglan na lang og usa ka daog aron maangkon ang ikatulong dapit sa collegiate division human gipilde ang USJ-R Jaguars sa iskor nga 79-72.

Si Joven Cid Cortes maoy nangulo sa Warriors human siya mohakot og 27 puntos, samtang si Giovanni Padillo midugang og 21 puntos.

Ang Jaguars gipangulohan ni Jaymar dela Peña pinaagi sa iyang 17 puntos, gisundan nilang Edwin Bibera ug Kurt Amores nga parehong mi-iskor og 13 puntos. 

Puntos Matag Usa

USC (79) - Cortes 27, Padillo 21, Hermosa 10, Cantonao 7, Bakker 6, Otida 3, Gallarde 2, Bautista 1

USJ-R (72) - Dela Peña 17, Bibera 13, Amores 13, Villaver 9, Pateño 8, Lapiz 3, Nudalo 3, Alquizola 2, Pacinio 2. – BANAT NEWS