Garing, Pulpogan miposte'g daog

CEBU, Philippines - Parehong mikulit og daog ang Barangay Garing ug Barangay Pulpogan human gipilde ang tagsa-tagsa nila ka mga kaatbang sa Sangguniang Kabataan (SK) division sa 2009 Consolacion Fiesta Cup Basketball Tournament diha sa Consolacion Sports Complex.

Ang Garing nangayo pa og overtime una nila maangkon ang 65-63 nga kadaugan batok sa Tugbungan, samtang ang Pulpogan yano ra kaayong midemolis sa Lamac, 70-58.

Nahimong sikit ang duwa tali sa Garing ug Tugbungan sulod sa upat ka hugna nga miresulta sa panagtabla sa pagtapos sa final period, 57-all. Apan ang Garing miduslit sa ilang init nga opensiba sulod sa dugang singko minutos sa duwa aron angkonon ang daog.

Sa laing bahin, milusad og rally ang Pulpogan sa second half aron ilogon ang labaw gikan sa Lamac, 48-47, giusban nila kini sa final period og laing 22-11 run aron hingpit nga ilubong ang Lamac.

Sa Association of Barangay Council (ABC) category, gipatilaw sa Casacto sa labing una nilang kapildihan ang TORN, 62-53. Unang naglabaw og tres puntos ang TORN sa first period, 18-15, apan kalit lang nanginit ang Casacto pinaagi sa ilang 25-10 rally alang sa 12 puntos nga labaw sa halftime, 40-28.

Ang maong torneyo nga gipasiugdahan ni Consolacion ABC president Ma. Analee Gungob ug SK Federation chairperson Madel Hyacinth Herrera, usa sa mga kalingawan alang sa kapistahan sa lungsod sa Consolacion karong Oktubre 29, pahinungod sa ilang mahal nga patron San Narciso.

Puntos Matag Usa

Unang duwa:

Garing (65) - Pardillo 21, Ylaya 13, Bongcales 13, Gungob 8, Lauron 4, Palang 4, Luperte 2

Tugbungan (63) - Baydal 34, Visabella 12, Tumongha 4, Maraca 4, Fabilla 4, Maglasang 2, Cañon 2, Matbagon 2, Herrera 1

Ikaduhang duwa:

Pulpogan (70) - Jervie 20, Ybañez 17, Osabel 11, Moneva 7, Bangeal 6, Pastolero 4, Bantilao 3, Olorio 1, Amisola 1

Lamac (58) - Cabahug 17, Bihag 4, Gonzaga 7, Afenilla 7, Artizuela 4, Pepito 3, Lopez 2, Salibongcogon 2, Fernan 2

Ikatulong duwa:

Casacto (62) - Gerona 25, Cabahug 20, Loro 10, Bathan 4, Ardenio 2, Alilin 1

Torn (53) - Congson 29, Napuli 15, Flores 8, Tibon 4, Tumongha 2, Lagahit 2, Cataluña 2. – BANAT NEWS