Quezon misakmit sa Mandaue leg crown

CEBU, Philippines - Gisakmit sa Quezon Red Oilers ang ilang ikaduhang sunod-sunod nga leg title sa Smart Liga Pilipinas Conference III pinaagi sa pagbuntog sa Forward Taguig, 85-74 sa Mandaue City leg niadtong Sabado sa gabii diha sa Mandaue City Cultural and Sports Complex.

Ang maong kadaugan naghatag sa Oilers og kahigayonan nga moangkon sa usa sa duha ka automatic slots sa Superleg National Finals sunod bulan.

Sila si Luis Paraganas ug Angelus Raymundo maoy nangulo sa balanseng atake sa Oilers diin ilang gitapos ang four leg elimination phase uban ang 35 Liga Tour points human mipupo og 12 puntos sa Mandaue leg.

Si Paraganas maoy napiling leg's MVP nga ni-average og 14.0 points, 3.3 rebounds ug 2.3 steals.

Ang Taguig nga napalpak gihapon sa ilang kampanya, mipupo og siyete puntos sa Mandaue leg ug adunay 32 Liga Tour points nga mipahiluna kanila sa ikatulo nga dapit.

Ang mga koponan nga mo-okupar   gikan sa ikatulo hangtod sa ikalima human sa elimination phase makabaton og "twice-to-beat" advantage sa wildcard round nga maoy moila sa tulo ka qualifiers nga makig-uban sa duha ka automatic Superleg finalists.

Sa pagka karon, ang M.L. Kwarta Padala-Cebu Niños, kinsa walay pilde sa eliminasyon segurado na nga topseed sa Superleg National Finals bitbit ang 45 puntos.   (BANATNEWS)