CEBU, Philippines - Mga bag-ong dagway ang magtakus karon sa secondary division finals diin ang third seed Cebu Institute of Technology (CIT) Wildkittens nangahas paglangkat og laing dungog sa ilang pagpakigsangka batok sa fourth-ranked University of San Jose-Recoletos (USJR) Baby Jaguars sa pagsugod sa ilang "best-of-five" finals sa 9th season sa Cebu Schools Athletic Foundation, Inc. (CESAFI) karong adlawa diha sa Cebu Coliseum.
Ang mga natagak nga topseeds -- defending champion University of Cebu (UC) Junior Webmasters ug ang University of the Visayas (UV) Baby Lancers nga pulos nahiagum sa mga kamot sa mas ubos pa nilang mga kontra maoy mag-ilog sa ikatulong puwesto sa labing unang higayon.
Sa labing unang higayon sa kasaysayan, ang Wildkittens mi-abante sa finals human sa ilang 76-73 nga kadaugan batok sa Baby Lancers sa usa ka kulbahinam nga duwa niadtong Domingo.
Ang Baby Jaguars unang misakmit og luna sa finals human nila giharos ang Junior Webmasters sa ilang "best-of-three" semifinal series. Pinasikad sa ilang rekord sa elimination round, maanindot sab ang CIT-USJ-R match-up tungod kay wala maglayo ang ilang standing ug hipanglantawan nga susama sab kini kamabulokon sa sangka sa collegiate division.
Mga bitoon nga angay lantawon sa Wildkittens mao sila si Mark Jayven Tallo ug rookie Franklyn Batiguin. Sa habig sa Baby Jaguars, mopokus kini nilang power forward Clint Muñez ug rookie guard Arlister Escatron.
Ang finals sa collegiate division magpakita sa duha ka Goliaths -- ang 6-foot-11 nga si Gregory Slaughter sa UV ug ang 6-foot-9 nga si June Mar Fajardo sa UC nga parehong gusto mohatag og korona ngadto sa tagsa-tagsa nila ka koponan.
Ang University of Cebu (UC) Webmasters mibalik sa finals sa labing unang higayon sukad sila niduwa niadtong 2005, apan wala pa si Fajardo niadtong tungora. Alang ni Slaughter, mao kini ang iyang ikatulong pagduwa sa finals
alang sa eight-time champion UV Lancers.
Ang Webmasters, kinsa maoy no. 1 paghuman sa elimination round nakakuha og katungod aron moharong sa UV human gipalagpot ang University of San Carlos (USC) Warriors niadtong Domingo, 87-78.
Sila si Rogado ug Rommel Luceño maoy nangu sa Webmasters nga parehong mipupo og 18 puntos, samtang si Fajardo mi-iskor og 16 puntos.
Si Padillo mao gihapon ang nangulo sa Warriors sa iyang 17 puntos, si Joven Cid Cortes miamot og 14 puntos.
PUNTOS MATAG USA
UC (87) - Rogado 18, Luceño 18, Fajardo 16, Abella 15, Quilantang 6, Mohamad 6 Gomez 5, Cayanong 4
USC (78) - Padillo 17, Cortes 14, Cantonao 13, Hermosa 10, Gallarde 9, Padayao 7, Bautista 6, Otida 2 (BANATNEWS)