Bautista hukman karon

CEBU, Philippines - Hukman na si Rey 'Boom Boom' Bautista kun aduna pa ba kini ikabuga aron mokulit og daog human sa taas nga panahon niyang pagpahuway sa dihang sangkaon si Indonesian champion Marangin Marbun alang sa interim WBC International featherweight title karong gabii diha sa Pacific Grand Ballroom sa Waterfront Cebu City Hotel and Casino sa Lahug, ning siyudad.

Sa ilang weigh-in kagahapon didto sa Entertainment Plaza sa SM City-Cebu, ang garbo sa Candijay, Bohol mitimbang og 125.75 lbs. sa labing una niyang sangka sa mas bug-at nga featherweight division, samtang si Marbun mitimbang og 124.5 lbs.

Atngan usab karon kun anaa pa ba ni Bautista ang iyang knock-out punch, human operahi ang iyang kamot nga na-injured atol sa sangka niya batok sa Mehikanong si Heriberto Ruiz niadtong Nobiyembre 22, 2008 didto sa MGM Grand Garden Arena sa Las Vegas.

Dili sayon ang tahas ni Bautista kay ang iyang sangkaon nga si Marbun, kinsa gihulagway nga usa ka lig-ong boksidor miharos sa katapusang walo niya ka away. Kausa pa lang siya matumba sa 25 niya ka away.

Sa supporting bout, laing ALA fighter nga si Czar Amonsot nagtinguha sab nga mopakamang ni Jesus Muzaka sa Democratic Republic of Congo aron matabonan ang ngil-ad niyang away batok ni Morris Chule niadtong Mayo 16 didto sa Bohol.

Usa usab ka mahinungdanon nga away ang sagubangon sa 17-anyos nga si Jason Pagara batok ni Decha Bangluaygym sa Thailand.

Si undefeated lightweight prospect maninguha nga modaog aron matuman ang iyang tinguha nga moaway didto sa Estados Unidos.

Kun modaog si Pagara, molupad siya karong Pebrero aron mouban ni Mark Jason Melligen, kinsa nag-train didto sa Las Vegas.

Mokompleto sa undercard mao ang sangka sa taga-Cagayan de Oro City nga si Marjun Yap batok sa beteranong si Pramuansak Posuwan. – BANAT NEWS