USC, UC abot gud sa semis

CEBU, Philippines - Natuman gyud ang mga pangagpas sa kadaghanan nga ang topseed University of Cebu (UC) Webmasters ug ang fourth-seed University of San Carlos (USC) Warriors maoy mag-abot sa "best-of-three" semifinals sa collegiate division sa 9th season sa Cebu Schools Athletic Foundation, Inc. (CESAFI) basketball event sugod karong Domingo diha sa Cebu Coliseum.

Ang Warriors napilde ngadto sa Southwestern University (SWU) Cobras sa ilang tinaktakay nga playoff niadtong Martes, 66-64, apan nidaog sa duwa pinaagi sa technicalities dihang si CESAFI commissioner Felix O. Tiukinhoy Jr. mi-forfeit sa SWU pabor sa USC tungod sa pagpaduwa sa tulo ka suspendidong players nga sila si Eliud Poligrates, Rene Pacquiao ug Jefferson Pria tungod sa kalapasan nga ilang nabuhat. 

Tataw kaayo sa by-laws sa liga nga ang tanang players gidid-an sa pagduwa og laing torneyo samtang nagpadayon pa ang CESAFI season.

Bisan og nipagawas na og kamandoan si Tiukinhoy, si SWU head coach Dodie Miego mipaduwa gihapon nilang Poligrates, Pacquiao ug Pria.

Ang management sa SWU mirason nga dili kadto sayop sa ilang mga players dihang niduwa sila og laing liga kay sa ilang pagtuo natapos na ang season nila human sa ilang   72-80 nga kapildihan ngadto sa Warriors niadtong Oktubre 4.

Gumikan sa pagduwa nilang Poligrates, Pacquiao ug Pria, ang Cobras mikontrolar sa duwa bisan pa og misikit ang Warriors, 44-45 human sa three-point play ni Gene Noel Gallarde sa tunga-tungang bahin sa third period.

Apan, sa kalit lang, si Chris Litorja mihimo sab sa iyang kaugalingong three-point play aron lawgan ang Cobras og 12 puntos nga bentaha sa iskor nga 59-47 dayon na sa katapusang hut-ong sa duwa.

Si Poligrates, kinsa migamit sa ngan nga J. Mangubat sa iyang jersey atol sa duwa sa Barangay Kalunasan, maoy nangulo sa Cobras nga mibugha og 24 puntos, si Pacquiao mipupo og 15 puntos, samtang si Litorja miani og 12 puntos.

Sa Gallarde mao sab ang nangulo sa pilderong Warriors pinaagi sa iyang 12 puntos, gisundan ni Michael Cantonao nga miabuno og 11 puntos.

Sa laing bahin, ang   eight-time CESAFI champion University of the Visayas (UV) Green Lancers mosugod na sa ilang kampanya pagdepensa sa korona batok sa University of San Jose-Recoletos (USJ-R) Jaguars bisan og wala si Eulogio Lasala Jr.

Si Lasala Jr. nasuspenso sab human kini misupak sa kamandoan ni Tiukinhoy sa pagsalmot sa slam dunk contest niadtong Domingo. 

Puntos Matag Usa

SWU (74) - Poligrates 24, Pacquiao 15, Litorja 12, Armecin 8, Gallarde 5, Diango 4, Pria 2, Palileo 2

USC (66) - Gallarde 12, Cantonao 11, Padillo 9, Cortes 9, Hermosa 5, Bakker 5, Codilla 5, Bautista 3, Vitug 2, Otida 2, Duran 2, Panerio 2, Bercede 1. – BANAT NEWS