RCY-PNRC milusad sa ilang Red Cross Humanity Race

CEBU, Philippines - Ang Red Cross Youth-Cebu ug Philippine National Red Cross (PNRC)-Cebu Chapter mopahigayon sa ilang labing unang Red Cross Humanity Race karong Nobiyembre 22 diha sa PNRC Bldg., Osmeña Blvd., ning siyudad.

Ang lumba gibahin sa upat ka dibisyon – 10K (Open), 10K (Executive Open), 5K (Open) ug 5k (Red Cross Youth/Volunteer/Staff)

Atol sa press conference kagahapon diha sa PNRC Cebu-Chapter building, si race organizer ug RCY coordinator Alvin Adolfo nagkanayon nga gilusad nila ang maong lumba aron modani sa mga kabatan-onan nga motabang sa komunidad isip volunteer sa Red Cross.

Matud pa ni Adolfo nga sa milabay'ng mga katuigan daku ang papel sa ilang mga Youth Volunteer nga maoy mihatag og tabang ilabi na sa panahon sa kalamidad. Gidugang usab niya nga ang matigom nga salapi sa maong lumba malakip sa ilang pundo nga maoy gamiton sa ilang mga proyekto ug outreach program.

Sa iyang bahin, si race director Joe Deresas nagkanayon nga gawas sa mga top runners sa Sugbu, modagan usab ang mga tinun-an gikan sa mga nagkadaiyang tunghaan dinhi sa Sugbu.

Gidapit usab ni Deresas ang mga runners gikan sa mga silingang lalawigan sa Sugbu aron mosalmot sa lumba.

Gawas sa mga tropeyo, ganting salapi ang madawat sa mga mananaog sa 10K ug 5K Open. Ang kampiyon sa 10K Open mobulsa og P5,000, ang second placer makaangkon og P3,000, samtang ang third placer makadawat og P2,000.

Ang top three finishers sa 5K Open makadawat og P3,000, P2,000 ug P1,000 matag usa.

Ang registration sugdan karong Lunes diha sa PNRC Cebu Chapter Bldg. Aduna kini registration fee nga P300 libre na ang singlet ug Red Cross membership, samtang P200 alang sa mga estudyante ug P150 sa mga Red Cross Volunteers. – BANAT NEWS