USC gi-forfeit

CEBU, Philippines - Lab-as pa sa panumduman human sa nahitabong kagubot sa men’s volleyball, si Cebu Schools Athletic Foundation Inc. commissioner Felix 'Boy' O. Tiukinhoy Jr. mipagawas na sab og laing desisyon sa pag-forfeit sa semifinals match tali sa University of San Carlos Warriors ug Southwestern University Cobras sa CESAFI collegiate basketball niadtong Oktubre 4 diha sa Cebu Coliseum pabor sa SWU.

Si Tiukinhoy nakahukom nga ihatag sa SWU ang daog human niya masayri nga ang star player sa USC nga si Paul Joven nakahimo og kalapasan sa patakaran sa CESAFI dihang niduwa kini og usa ka exhibition game sa DECA Home Phase 2 Christmas Friendship Games, usa ka semana sa wala pa ang ilang sangka batok sa Cobras.

Matud pa ni Tiukinhoy nga nakuha niya ang maong impormasyon gikan mismo ni UV head coach Elmer 'Boy' Cabahug atol sa paglusad sa 2009 CESAFI All-Star Games niadtong Huwebes diha sa Cebu Country Club.

Gidasonan usab kini sa assistant ni Cabahug nga si Al Solis, kinsa nakasaksi sa pagduwa ni Joven sa maong exhibition games didto sa DECA Homes.

Human madungog ang maong taho daling gipatawag ni Tiukinhoy si Joven sa iyang opisina ug dali usab nga mitug-an ang USC cager sa iyang kalapasan. “I told (Joven) that because of what he did, I have no choice than to implement the rule. I have to suspend him for that infringement,” matud pa ni Tiukinhoy.

Ang maong aksiyon maoy tubag ni Tiukinhoy sa nalagda sa CESAFI rule book nga nagdili sa mga atleta nga moduwa sa laing liga ug sports event samtang nagpadayon pa ang CESAFI season.

Sa maong duwa, midaog ang USC batok sa SWU, 80-72, nga maoy naghatag nila og pasaporte aron mo-abante ngadto sa semifinals, apan nahanaw kini human sa gipahamtang nga silot ni Tiukinhoy.

Tungod niini, nakaangkon karon og laing kahigayonan ang SWU aron masakmit ang semis berth, apan kinahanglan una nilang pildihon ang USC nga nagbitbit og twice-to-beat advantage. Ang duha ka protagonista mag-abot karong Martes alang sa deciding game diha sa Cebu Coliseum.

Mao kini ang ikaduhang bug-at nga silot nga gipahamtang ni Tiukinhoy sud ning semanaha.

Ning bag-o, gisilotan ni Tiukinhoy ang men’s volleyball coaches sa UV, USC ug SWU human sa ilang pag-walk-out atol sa semifinals. – BANAT NEWS