MS Motocross Series dad-on sa Naga

CEBU, Philippines - Dili momenos 70 ka dirtbikers ang mopakita sa ilang makapaukyab nga abilidad sa ipahigayong 13th leg sa 2009 MS Motosuit Motocross Series karong Sabado diha sa Naga, Cebu.

Gawas sa local riders, pipila ka mga bisitang riders gikan sa Visayas ug Mindanao region ang mopakita sab sa ilang talento ning maong kompetisyon nga ulohan og 'Enan Mendiola Chiong Memorial Motocross Competition."

Mga top riders nga angay tutokan mao si Jon-Jon Adlawan, ang managsuong Jovanni ug Jubenile Abellar sa PowerSports Racing Team, crowd-darling John Flores, Bonnie Bustillo, Dongkey Sanchez, Paulo Inoc, Weng ug Ambo Yapparcon ug Rex Barbaso ug uban pa.

Sa laing bahin, si reigning "Rider of the Year" nga si Seigfred Ornopia mopakita sab sa iyang talagsaong abilidad.

Si Ornopia sa Keiz BJ Racing Team, gipaabot nga magsagubang og lisud nga hagit gikan nilang Nonoy Reluya ug Jun Enriquez ug uban sa executive division.

Gawas sa dakung dungog, tuyo sab sa mga riders nga mokolekta og dugang puntos nga ilang kinahanglanon alang sa overall standings nga maoy basihan alang sa pagpili sa "Rider of the Year" award ning maong kalihukan nga gipaluyohan sa Castrol Power One, MS MotocrossTV ug GS Battery.   (BANATNEWS)