Sinukmagay sa Duljo karong gabii

CEBU, Philippines - Mopakita na usab ang mga amateur boxers gikan sa nagkalain-laing boxing stables dinhi sa Sugbu alang sa laing edisyon sa Cebu City Amateur Developmental Tournament nga giulohan og "Paboksing sa Barangay 2009" karong alas-8 sa gabii diha sa Barangay Duljo Fatima basketball gym, ning siyudad.

Mga sikat nga boxing stables ang moparada sa ilang mga boksidor sa 38 kgs., 40 kgs., 50 kgs. ug 63 kgs. weight division.

Lakip sa mopakita og aksiyon mao ang mga batos sa Sanai Boxing Stable, Omega Boxing Stable sa Mandaue City, Losamba Stable ug mga boksidor gikan sa lungsod sa Compostela.

Mopakita usab og aksiyon ang mga amateur boxers gikan sa Cebu City Sports Center (CCSC) Stable nga gituhoang maoy manghawod sa torneyo tungod sa kadaghan sa ilang boksidor.

Sila si Junriel Jimenez, Allan Rafuela, Raymund Empic, Ian Refuella, John Kennan Villaflor ug Clifford Loreto maoy pambato sa CCSC stable.

Si Jennie Faelnar, ang Executive Officer sa Cebu City Sports Commission (CCSC), usa sa mga dinapit sa maong torneyo nga gipasiugdahan nila ni Cebu City Councilors Sylvan 'Jack' Jakosalem ug Raul 'Yayoy' Alcoseba ug Michel Lhuillier uban sa suporta sa Cebu City Government ubos sa liderato ni Mayor Tomas Osmeña. – BANAT NEWS