Borinaga nanghawod sa 1st Kiddie Chess title

CEBU, Philippines - Tinun-an sa Gabi Elementary School nga si Justine Borinaga maoy misakmit sa kampiyonato sa 1st Kiddie Chess Tournament nga gipasiugdahan sa AboitizLand Chess Club diha sa Persimmon Plus sa barangay Mabolo, ning siyudad.

Sila si Miah Diane Vilanoba ug Chanelie Tabliga nga pulos gikan sa Lagtang Elementary School  maoy mipahiluna sa ikaduha ug ikatulo nga dapit.

Katloan ug tulo (33) ka mga tinun-an gikan sa Gabi, Lagtang ug Mabolo Elementary Schools ang nisalmot sa maong kompetisyon nga gisuportahan sab sa AboitizLand Social Projects Committee.

Si Andoni Aboitiz, ang president ug COO sa AboitizLand mipadayag sa iyang pagdayeg ngadto sa AboitizLand Chess Club sa malampusong pagdumala aron mapundok ang mga tinun-an gikan sa tulo ka mga eskuylahan alang sa maong torneyo.

Ang kompetisyon magsilbeng culminating activity sa sunod-sunod nga chess clinics alang sa tulo ka tunghaan.

Kan’uman (60) ka mga bata sa Gabi, Lagtang ug Mabolo Elementary Schools, adunay taas-taas nga panahon pagkat-on sa chess sud sa tulo ka sunod-sunod nga Sabado niadtong Agosto. Atol sa katapusang sesyon sa clinic, ang matag eskuylahan naghimo og mini tournament, diin 10 ka mananaog ang nirepresentar sa ilang tagsa-tagsa ka tunghaan sa 1st Kiddie Chess Tournament.

Segun sa pagtuon, ang chess usa ka duwa nga mopalambo sa organizational ug analytical skills sa tawo. Ang mga bata nga sayong maulipon sa maong duwa mamahimong batid ug dali usab nga makat-on itandi niadtong wala pa maladlad sa maong matang sa duwa. Ang chess makadugang sa memory skills ug concentration techniques. - Yoyo R. Abayan (BANAT NEWS)