CEBU, Philippines – Nahimong kulbahinam ang ikatulong adlaw sa 2009 Milo Little Olympics-Visayas human nipakita og maayong labok ang defending champion University of Cebu (UC) nga kasamtangan karong nag-una sa secondary division kagahapon diha sa Cebu City Sports Center.
Hinuon, dili pa maseguro sa UC ang kampiyonato tungod kay lima pa ka duwa ang tigian nga moabot og 185 points. Ang UC nag-una karon bitbit ang 129.25 points, gisundan sa University of San Carlos nga adunay 107.5 points.
Ang UC maoy over-all champion sa secondary girls ug boys athletics ug table tennis, samtang ang USC mipupo og 30 puntos human midaog ang ilang pambato nga si Sally Mae Siso batok sa University of San Jose Recoletos, 2-0 sa tennis sa secondary level.
Apan nasugamak ang USC dihang napusoy sila sa tennis sa secondary boys division batok sa USJ-R, 2-1. Nakadugang og problema sa USC mao ang pagka-injured sa ilang sinaligan nga si Bernadine Siso.
Sa laing bahin, midaog sab ang Bright Academy sa pagpangulo ni Jana Pages dihang ilang gipukan ang Banilad, 2-0. Ang 10-anyos nga si Pages maoy miaswat sa iyang koponan aron milangkat ang titulo. Tungod niini si Pages maoy gibayaw isip Most Outstanding Athletes sa elementary level.
Ang Abellana National School mao ang third placer sa ilang 72.25 points dihang nidaog ang ilang football team batok sa Springdale, 3-2.
Gilubong usab sa Sacred Heart School-Ijas de Jesus (SHS-IJ) ang CIC Mandaue, 5-2, sa secondary boys football event, samtang ang ilang sister school nga SHS-J mipakaging usab sa Don Bosco Technology Center, 2-0.
Sa elementary level, ang Cebu Institute of Technology (CIT) mao ang nag-una bitbit ang ilang 61 puntos, 50 puntos niini gikan sa athletics. Nagsunod ang SHS-J sa ilang 41.25 points ug USC sa ilang 39 puntos. – BANAT NEWS