IBP Run mosikad ugma

CEBU, Philippines - Pormal na nga gilusad ang labing unang Integrated Bar of the Philippines (IBP) Fun Run nga mosikad ugma diha sa Provincial Capitol grounds.

Atol sa press conference kagahapon diha sa IBP Building sa Provincial Capitol, si race director ug The Freeman sports columnist Raffy Uytiepo nagkanayon nga ang mga abogado ug mga kawani sa IBP ang moapil sa dagan ubos sa 3K ug 5K categories.

 Sa iyang bahin, si Atty. Erwin Rommel Heyrosa nagkanayon nga ang Fun Run usa lamang sa ilang sports activities alang sa ilang anibersaryo.

Ang IBP mopahigayon sab og kompetisyon sa tennis, basketball ug shooting. 

Gawas sa lawyers category, aduna say 5K Open category diin ang mga tang-ang runners ang magtigi.

Ang hari sa Don Sergio Osmeña Sr. (DSOS) Run niadtong Miyerkules nga si Mendel Lopez maoy mangulo sa 5K mens. Gipaabot sab mosalmot ang managsuong Eugene ug Joel Delposo.

Sa iyang bahin, si Leizl Lumindas-Getaruelas naglaraw nga mamawi ning higayona human mapakyas paglangkat sa titulo sa DSOS run. Apan kinahanglan una niyang pildihon sila si Mary Grace delos Santos ug Madelyn Carter nga maoy mga babag sa iyang dalan. 

Mikompirmar usab sa ilang partisipasyon ang inilang news anchor sa ABS-CBN nga si Atty. Haide Acuña ug ang Guardo Running Club ni sportsman-businessman Jonathan 'Atan' Guardo.

Gawas sa mga medalya, ganting salapi ang madawat sa makampiyon sa matag kategoriya. – BANAT NEWS